UNICEF: Ғазода ҳар учинчи одам кунларни очлик билан ўтказади, болалар эса ҳалок бўлиш хавфи остида

БМТ Болалар жамғармаси (UNICEF) Ғазода очарчилик хавфи кескин ортиб бораётганини ва ҳар учинчи инсон бир неча кунлаб овқатсиз қолаётганини маълум қилди. Ташкилотнинг таъкидлашича, очарчилик сабаб ҳалок бўлганлар сони 162 нафарга етган, шундан 92 нафари болалардир.

UNICEF раҳбари ўринбосари Тед Чайбан Исроил, Ғазо ва Ғарбий Соҳилда бўлиб қайтгач, вазият ачинарли даражага етганини тасдиқлади. 

“Бугун танлов нуқтасидамиз. Қабул қилинадиган қарорлар ўн минглаб болаларнинг яшаши ёки ўлишини белгилаб беради”, деган у. 

Шанба куни 17 ёшли ғазолик Ўтеф Абу Хотер очликдан ҳалок бўлди. Шифокорларнинг айтишича, Исроилнинг анклавга ҳужумларидан аввал соғлом бўлган йигит сўнгги ҳафталарда озиқ-овқат танқислиги сабаб жон берган. 

Умуман олганда, 2023 йилнинг 7 октябрь санасидан бери Исроил ҳужумлари натижасида 60 мингдан ортиқ фаластинлик ҳалок бўлган, улардан 18 минг нафари болалардир. Аммо бу ҳаммаси эмас. Кўплаб қурбонлар вайроналар остида қолиб кетгани боис бедарак йўқолганларнинг аниқ сони ҳақида маълумот йўқ. 

Яҳудий давлати жорий йилнинг март ойидан бошлаб Исроилга гуманитар юклар киришини тўхтатиб қўйди. Натижада анклав бўйлаб қисқа вақт ичида очарчилик авж олди. Исроил май ойи охирига келиб чекловларни бир оз юмшатди. АҚШ кўмаги билан ташкил этилган GHF (Gaza Humanitarian Foundation) ташкилоти UNRWA ваколатларини ўз қўлига олди. 

Бироқ GHF тарқатиш пунктларига келган тинч аҳоли ўққа тутилган ҳолатлар сабаб ташкилотга нисбатан танқидлар кескин урчиди. БМТ маълумотига кўра, озиқ-овқат олиш учун келган 1 300 дан ортиқ фаластинлик ўлдирилган. Ғазода қолган фаоллар ва журналистлар уларга Исроил аскарлари билан бир қаторда, АҚШ ёллаган хусусий ҳарбий компания ходимлари ҳам ўт очганини маълум қилган.

Халқаро босим ортидан АҚШ президенти Дональд Трампнинг махсус вакили Стив Уиткофф ва Қўшма Штатларнинг Исроилдаги элчиси Майк Хакаби GHF тарқатиш пунктида бўлиб, вазиятни кўздан кечирди. ҲАМАС эса уларнинг ташрифини жамоатчилик фикрини чалғитиш учун уюштирилган спектакл деб атади.

GHF пунктлари билан бир қаторда, анклавга Ғарб ва араб давлатлари томонидан ҳаво орқали гуманитар юклар ташлаш ҳам бошланди. Аммо халқаро инсонпарварлик ташкилотлари бу етарли эмаслигини билдирган. 

“Ҳар бир йўл, ҳар бир дарвоза очилиши лозим, ҳаводан ташланаётган ёрдам қуруқлик орқали келаётган юк машиналари ўрнини қоплай олмайди. Болаларга керак бўлгани – барқарор ўт очишни тўхтатиш ва сиёсий ечимдир”, деган UNICEF расмийси Чайбан. 

Исроил бош вазири Биньямин Нетаньяху ва собиқ мудофаа вазири Гоав Галлантга қарши Халқаро жиноий суд ҳисбга олиш ордерини берган. Улар “инсониятга қарши жиноят” бўйича маҳкамага тортилган.