“Марказий Осиёни бирор сиёсий чора орқали Россия таъсиридан чиқара оламиз, деб ўйлаётганлар чучварани хом санайди” – журналист Навбаҳор Имомова

Бирор сиёсий чора орқали Марказий Осиёни Россия таъсиридан чиқариб олиш имконсиз, дея фикр билдирди “Америка овози” мухбири Навбаҳор Имомова “Дарё”га берган интервьюсида.

Навбаҳор Имомованинг айтишича, Вашингтон минтақа расмийлари “Америка овози” мухбирига бирор бир тарафни танлашга мажбур эмасликларини айтиб келади.

“Америка расмийларидан энг кўп эшитадиган гапимиз: “биз географияни ўзгартира олмаймиз. Марказий Осиёни Хитойнинг шундоққина биқинида ёки Россиянинг жанубида экани, Эроннинг шарқий қисмида экани ёки Афғонистоннинг шимолида эканини ўзгартира олмаймиз. Мамлакатлардаги динамика, у ердаги сиёсатга раҳбарлар таъсир қилади. Буларни Қўшма штатлар ҳам, Европа иттифоқи ҳам бартараф эта олмайди”, – дейишади. Яъни агар Қўшма штатларда ёки Европа иттифоқида бирор бир расмий Марказий Осиёни Россия таъсиридан чиқара оламиз, деб ўйлаётган бўлса, ўзбекча қилиб айтганда чучварани хом санаган бўлади. Чунки бирор сиёсий чора орқали бундай қилиш имконсиз. Минтақани Россия ёки бошқа давлатлар билан узоқ асрлик маданий, иқтисодий-сиёсий ришталар боғлаб туради. Вашингтон минтақа, хусусан, Ўзбекистон расмийларига “биз бирор бир тарафни танлашга мажбур эмассиз, деймиз”, дея таъкидлаб келади. Америка ёки Европа иттифоқи бизни танланг, Россия билан камроқ ишланг, Хитойдан камроқ сармоя олинг, бошқаларни ёрдамига таянманг, демаяпти. Ва бундай деяётган бўлса ҳам, оддий қилиб айтганда, аҳмоқлик бўлади. Бундай деб ўйлашимизга асос йўқ”, – деди журналист.

Навбаҳор Имомованинг қўшимча қилишича, АҚШ Марказий Осиё мамлакатлари Россия-Украина урушида бетарафлик позициясини танлашга мажбурлигини тўғри тушунади.  

“Америка расмийлари “кўриб турибсиз, биз бу урушда Украинани қувватлаяпмиз. Атрофдаги давлатларнинг суверенитети, мустақиллиги ва ҳудудий яхлитлиги бузилишидан ҳам хавотирдамиз. Билинг, агар сиз ҳам бу борада чўчиётган бўлсангиз, сизнинг тарафингиздамиз. Биз тушунамиз, сиз бетарафлик позициясини танлагансиз. Чунки бу сизга қимматга тушиши мумкин. Бу борада сизни салбий баҳоламаймиз. Лекин биз билан ҳам янги имкониятлар очишингиз мумкин. Ҳамкорликни биз кенгайтираверишимиз мумкин”, деяпти. Тарихнинг мана шу палласида Америка Марказий Осиё давлатларига айтяптики, “сиз танлашга мажбур эмассиз. Биз тушунамиз. Россия билан ҳам ришталарингиз давом этиши керак. У ерда маҳкам занжирлар бор. Тушунамиз, биз билан ҳам ўзаро манфаатларингиз бор. Хавотир олманг, муштарак манфаатларимиз юзасидан ишлайверамиз” деб. Чунки катта-катта можаролар юз берганида давлатлар хоҳлайдими, йўқми, ким билан кўпроқ бўлишимиз тўғри, деб ўйлаб қолади”, – деди “Америка овози” мухбири.

Аввалроқ АҚШ ташқи ишлар вазири Энтони Блинкен Ўзбекистон ва Қозоғистонга ташриф буюргани, икки давлат раҳбарлари билан музокаралар олиб боргани хабар қилинганди. Кейин Россия ташқи ишлар вазири Сергей Лавров Блинкеннинг ташрифи бўйича муносабат билдириб, АҚШнинг Марказий Осиёдаги фаоллигини оширишдан мақсади уларнинг Россия билан яхши муносабатда бўлишига йўл қўймаслик эканини айтди. 

Мавзуга доир:
АҚШ бош дипломати Тошкентга келмоқда. Ташриф сабаблари ҳақида журналист Навбаҳор Имомова билан суҳбат (видео)

“Музокаралар ёпиқ эшиклар ортида бўлди” — АҚШ давлат котиби Энтони Блинкеннинг Тошкентга ташрифи таҳлили (видео)