Россия ташқи ишлар вазири Сергей Лавров АҚШ Давлат котиби Энтони Блинкеннинг Қозоғистон ва Ўзбекистонга ташрифига муносабат билдирди. Бу ҳақда “Известия” хабар берди.
Лавровнинг сўзларига кўра, АҚШнинг Марказий Осиёдаги фаоллигини оширишдан “мақсад” бу давлатларнинг Россия билан яхши муносабатда бўлишига йўл қўймасликдир. Дипломат Ғарб Россияга қарши МДҲ маконида ишлаётганини яширмаслигини айтди. У МДҲ давлатларида нафақат америкаликлар, балки европаликлар ва инглизлар ҳам фаоллик кўрсатаётганини билдирди. Лавров уларнинг барчаси Россиянинг иттифоқчи давлатлар билан ҳамкорлигига “салбий таъсир” кўрсатишни хоҳлашини айтди.
“Улар бу мамлакатларнинг Россия билан яхши муносабатларини сақлаб қолишига йўл қўймаслик учун шундай фаоллик кўрсатмоқда” — деди у.
Россия ташқи ишлар вазири Ғарб МДҲ давлатларини ўз позициясини олдиндан ҳал қилишга чақираётганини қўшимча қилди.
АҚШ Давлат котиби Энтони Блинкен ва Россия ташқи ишлар вазири Сергей Лавров 2 март куни Нью-Деҳлидаги G20 ташқи ишлар вазирлари саммити доирасида уруш бошланганидан бери илк юзма-юз учрашди. АҚШ Давлат департаментининг исмини ошкор этмаган вакилининг CNN телеканалига айтишича, учрашув режалаштирилмаган ва тахминан ўн дақиқа давом этган. Блинкен учрашув ўтказишни таклиф қилган. Россия Ташқи ишлар вазирлиги расмий вакили Мария Захарова буни тасдиқлади.
АҚШ Давлат котиби Энтони Блинкен Марказий Осиё давлатлари бўйлаб сафарини Қозоғистонга ташриф билан бошлади. У ерда республика раҳбари Қосим-Жўмарт Тўқаев билан учрашувда хавфсизлик масалалари ҳамда Вашингтон билан дипломатик муносабатларни муҳокама қилди. Сиёсатчи ҳамкасби билан мулоқотда бир неча бор Россияни тажовузкорликда айблаш имкониятини бой бермади.
Изоҳ (0)