20 февраль куни Ар-Риёдда бўлиб ўтиши режалаштирилган, унда араб давлатлари етакчилари АҚШ президенти Дональд Трампнинг фаластинликларни мажбурий кўчириш режасига жавобни муҳокама қилиши керак бўлган саммит 21 февралга қолдирилди. Бу ҳақда AFP агентлиги араб давлатлари дипломатларига таяниб хабар берди.
Ар-Риёдда араб давлатларининг тор доирадаги саммити 20 февралдан 21 февраль кунига кўчирилди, деди AFP агентлигига Саудия Арабистонидаги манба.
Ар-Риёдда бўлиб ўтадиган учрашувда Форс кўрфази араб давлатлари ҳамкорлик кенгаши, унинг таркибида жами олтита давлат — БАА, Баҳрайн, Саудия Арабистони, Уммон, Қатар ва Кувайт етакчилари, шунингдек, Миср ва Иордания раҳбарлари иштирок этиши кутилмоқда.
AFP 20 февраль куни Саудия Арабистонида БАА, Миср, Иордания ва Қатар раҳбарлари саммити бўлиб ўтиши ҳақида хабар берганди. Кейинчалик иштирокчилар доираси кенгайди: агентлик ёзганидек, бу “нуфузли Форс кўрфази давлати Ар-Риёддаги саммитга таклиф этилмаганидан норозилик билдиргани” туфайли юз берди. Натижада ташкилотчилар таркибни кенгайтириб, унга Форс кўрфазининг барча мамлакатлари вакилларини қўшди.
Трамп АҚШ президенти лавозимига киришганидан сўнг фаластинликларни Ғазо секторидан ташқарига кўчириш таклифи билан чиқди. Фаластин раҳбари маслаҳатчиси Маҳмуд ал-Ҳабаш президентнинг ниятларини мустамлакачилик ҳаракати деб атади. Араб давлатлари Америка етакчисининг бу ғоясини кескин қоралаб, сўнгги 100 йил давомида фаластинликларни ўз ватанидан сиқиб чиқаришга қарши курашиб келган араб дунёси учун бундай қарор қабул қилиб бўлмаслигини айтди.
Кейинроқ АҚШ давлат котиби Марко Рубио Вашингтон Фаластин ҳудудлари тақдири масаласида араб давлатлари билан мунозараларга очиқ эканини маълум қилди. Бундан ташқари саммит доирасида Россия ва Украина можароси ҳам муҳокама қилиниши кутилмоқда.
Россия ва АҚШ музокаралари 18 февраль куни бўлиб ўтиши мумкин
Манбаларга кўра, Саудия Арабистони пойтахти Ар-Риёдда 18 февраль куни Россия ва АҚШ делегациялари иштирокида Украина бўйича музокаралар бўлиб ўтади.
Яқин кунларда Украина президенти Владимир Зеленский ҳам Саудия Арабистонида бўлади. Ушбу Америка-Россия музокараларида Киев вакили иштирок этмайди. Баъзи маълумотларга кўра, Россия делегацияси таркибига ташқи ишлар вазири Сергей Лавров ҳам киради. 12 февраль куни АҚШ президенти Дональд Трамп россиялик ҳамкасби Владимир Путин билан телефон орқали суҳбатлашди. Кремль музокаралар ўтказилганини тасдиқлади ва Трампни Москвага таклиф этди.
Трамп мазкур суҳбатдан сўнг Украина президентига ҳам қўнғироқ қилди. Зеленскийнинг сўзларига кўра, Трамп суҳбатда Путин билан бўлган мулоқотнинг тафсилотларини айтиб берган. АҚШ президенти Украина раҳбари ҳам, Путин сингари, тинчлик ўрнатишни истаётганини айтган.
14 февраль куни эса Трамп Саудия Арабистонида Украинадаги можарони ҳал этиш бўйича музокаралар ўтказилишини маълум қилди.
Изоҳ (0)