Россия қўшинлари Донецк вилоятидаги муҳим плацдармлардан бир Покровск шаҳрини қуршаб олиш бўйича ҳаракатларини кучайтирмоқда. Бу ҳақда Буюк Британия Мудофаа вазирлиги маълум қилди.
Ҳисоботда айтилишича, сўнгги бир ҳафта ичида россияликлар Покровскнинг шимоли-шарқи бўйлаб бир оз илдамлашга муваффақ бўлган. Бу эса шаҳарни мудофаа қилаётган Украина гарнизонининг таъминот йўлларига хавф туғдирган. Россия кучлари H-32 автомагистрали бўйлаб Родинск шаҳарчаси томон силжиб, шунингдек, Миролюбивка ҳудудида ҳам позицияларни эгаллаган.
Июль ойида Россия саботаж гуруҳлари Покровск жанубига киришга уриниб кўрган, аммо бу уриниш Украина мудофаачилари томонидан бартараф этилган эди. 2024 йил февраль ойида Авдийивка босиб олинганидан буён Россия учун асосий ҳужум йўналиши Покровск бўлиб қолди. Украина расмийларининг маълум қилишича, сўнгги 24 соат ичида Покровск йўналиши бўйлаб 66 та ҳужум қайтарилган.
Россия ва Украина ҳарбий ҳаракатларни давом эттирар экан, урушни дипломатик йўл билан якунлаш ҳақидаги баёнотлар ва реаллик ўртасидаги масофа тобора узоқлашмоқда. Истанбул шаҳрида бошланган музокаралар, асирлар ва жасадлар амлашинуви каби кичик келишувларни ҳисобга олмаса, айтарлик натижа олиб келмади.
Россия собиқ президенти ва ҳозирда РФ Хавфсизлик кенгаши раиси ўринбосари ҳисобланган Дмитрий Медведовнинг ядровий қурол ҳақидаги баёнотлари ортидан Трамп Қўшма Штатларнинг иккита ядровий сувости кемаси номаълум ҳудудга жойлаштирилишини айтди. Оқ уй раҳбари, шунингдек, унинг мамлакати Россия билан “ядровий урушга тайёрлиги”ни таъкидлади.
Изоҳ (0)