Самарқандда ўқувчининг онаси «замдиректор»ни калтаклагани ҳақида хабар берилган эди. Ҳолат юзасидан вилоят халқ таълими бошқармаси қўшимча маълумот тақдим этди.
Қайд этилишича, ушбу ҳолат Тойлоқ тумани халқ таълими бўлими томонидан ўрганилган. Тумандаги 6-умумтаълим мактабида 17 ноябрь куни дарс жадвалига асосан 1-соат 9-«А» синфида она тили дарси бўлган. Фан ўқитувчиси Д.Ғ. 1-соат дарсда бўлса-да, география ўқитувчиси М.Х. оиласида маърака борлиги учун илтимос қилиб, ўзаро келишувга кўра, 2 та синфда ( 9-«А» ва 9-«Б» синфида) параллел равишда дарс ўтган.
Соат 8:25 да 9-«Б» синфида география дарсини ўтаётган ўқитувчи М.Х. воқеа содир бўлган пайт 9-«А» синфига топшириқ бераётган бўлган. Назоратсиз қолган 9-«Б» синф ўқувчилари М.Д. синфдоши Ш.Ш.га ручкасини узатаётган пайтда (отиб юборган) тасодифан синфдоши Х.Н.нинг кўзига тегиб кетиб, жароҳатлаган. Шу пайтда мактаб ҳамшираси Э.Г. ва мактабнинг маънавий-маърифий ишлар бўйича директор ўринбосари жабрланувчи ўқувчини тез ёрдам келишини кутмасдан йўл машинасида Тойлоқ тумани тиббиёт бўлимига олиб борган ва Х.Н.нинг ота-онасига хабар берилган.
Туман тиббиёт бўлими тез ёрдам бўлинмасида беморга зудлик билан биринчи ёрдам кўрсатилиб, вилоят шифохонасига юборилган ва жарроҳлик амалиёти ўтказилган. Жабрланувчи Х.Н.нинг онаси V.Ш. 24 ноябрь куни соат тахминан 9:10 атрофида мактабга келиб, маънавий-маърифий ишлар бўйича директор ўринбосари Н.Х.нинг сочидан тортиб, дўппослаб урган. Таъкидланишича, жабр кўрган қизнинг онаси содир бўлган ҳодиса ҳақида директор ўринбосари унга ўз вақтида хабар қилмаганини билдирган.
Ҳолат юзасидан олиб борилган ўрганишлар натижасига кўра, мактабда дарс пайтида ўқувчиларнинг назоратсиз қолдирилгани ва ўқитувчиларнинг ўзаро дарс алмашишига имкон яратилгани учун мактабнинг ўқув ишлари бўйича директор ўринбосари Б.Ш. ҳамда мактаб амалиётчи психологи М.А. билан тузилган меҳнат шартномаси бекор қилинган. Шунингдек, мазкур мактаб директори Р.Д. ўз аризасига кўра лавозимидан озод этилган.
Мавзуга доир:
Изоҳ (0)