Сирдарё вилояти Гулистон туманидаги 5-мактабда ўқувчининг яқинлари директор ўринбосари ва ўқитувчини калтаклагани ҳақида хабар берилганди. Вилоят ИИБ ахборот хизмати раҳбари Достон Шамсиддинов «Дарё»га ҳолат юзасидан бўлиб ўтган сайёр суд мажлиси натижаси ҳақида маълумот берди.
Қайд этилишича, жанжалга ўқувчининг мактабга кечикиб келгани ва ўқитувчининг унга танбеҳ бергани сабаб қилиб кўрсатилган. Ўқитувчи дарсга кечикиб келган ўқувчидан нимага тартибга риоя қилмаётгани тўғрисида сўраган, эвазига эса ундан ҳақоратли сўзлар эшитган. Ўқитувчи бу ҳақда директор ўринбосарига хабар берган. Директор ўринбосари ўқувчига бундай ҳолат яхши эмаслигини тушунтирмоқчи бўлганида ўқувчи уни ҳам ҳақоратлаб, уйига кетиб қолган.
М. ва Ғ. исмли шахслар эса умумтаълим мактабида ўғли ва ўқитувчиси ўртасида содир бўлган тушунмовчилик сабабини чуқур ўрганмай, мактабга борган. Мактаб биносида дастлаб ўқитувчини, сўнгра уни ҳимоя қилмоқчи бўлган директор ўринбосарини аёвсиз калтаклашган. Оқибатда ўқитувчи ва директор ўринбосарига Республика шошилинч тиббий ёрдам илмий маркази Сирдарё вилояти филиалида тиббий ёрдам кўрсатилган.
Ҳолат юзасидан ушбу шахсларга нисбатан Маъмурий жавобгарлик тўғрисидаги кодекснинг 183-моддаси (майда безорилик) билан 3 сутка қамоқ жазоси тайинланган.
Изоҳ (0)