Қашқадарё вилоятининг Косон туманида мактаб ўқувчиси жисмоний тарбия ўқитувчиси томонидан аёвсиз калтакланди. Мазкур мурожааат юзасидан «Дарё» мухбири суриштирув олиб борди.
Маълум бўлишича, ўқитувчи ўқувчини насос билан калтаклаган.
2022 йилнинг 21—22 октябрь кунлари тобим йўқлиги сабаб мактабга боролмадим. Соғайганимдан сўнг, 24 октябрь, душанба куни мактабга бордим. Ўша куни иккинчи соатда жисмоний тарбия дарси эди. Спорт формада залга кирдик ва болалар билан волейбол ўйнадик. Танаффусга 10 дақиқалар қолганда кийим алмаштириш учун хонамизга кетдик. Қайтиб келганимизда эса жисмоний тарбия ўқитувчимиз Миржаҳон Эшмуродов нега танаффус бўлмасдан кетиб қолдиларинг дея шкаф тагидаги насосни олиб, ҳаммамизни калтаклай бошлади, — дейди ўқитувчисидан шикоят қилган ўқувчи Бунёд Қурбонов.Ўқувчининг айтишича, ўқитувчи насос билан унинг бошига урган.
Мендан аввал бир кишини калтаклади. Сўнг менинг бошимга ургани учун бошим ёрилди ва қон кела бошлади. Мактаб ҳамшираси бошимдан оқаётган қонни тўхтатиш мақсадида спирт суртди. Аммо қон тўхтамади. Шундай бўлса-да, уйга қайтдим, — дейди у.Жабрланувчининг акаси Илёс Қурбонов укасининг аҳволидан хабар топгач, уни тиббий экспертизадан ўтказганини айтмоқда.
Косон туманидаги экспертизага бориб, тиббий кўрикдан ўтказдим. Бошини рентген қилдик. Кейин шифокорларга кўриндик. Улар томография қилдиришимиз кераклигини айтди. Шундан сўнг шифокорлар дори ёзиб берди. Хулосани эса ИИБ ходимларига айтганмиз дейишди, — дейди жарбланувчининг акаси Илёс Қурбонов.Маълум қилинишича, воқеа «Дарё»га мурожаат қилинганидан сўнг суриштирила бошланган.
Биз укамни шифокорларга кўрсатиб келганимиздан сўнг ИИБ ходимлари ўрганади, тегишли чора кўради деб ўтиргандик. Аммо ўртадан шунча кун ўтса ҳам ҳеч ким сўраб келмади. Шундан сўнг «Дарё» таҳририятига мурожаат қилдик. Шу мурожаатимиздан сўнг воқеа ҳақида суриштира бошлашди, — дейди Бунёднинг акаси.
Мурожаатчиларнинг қўшимча қилишича, мактабнинг жисмоний тарбия ўқитувчиси ўқувчиларини мунтазам равишда калтаклаб келади.
«Дарё» мухбири мурожаатчиларнинг мазкур эътирозидан сўнг Косон туманидаги 17-мактаб директори Азиза Ашировадан ўқитувчининг ҳаракатларига изоҳ сўраган. Бироқ директор журналист билан суҳбатлашишдан бош тортиб, изоҳ бермаган. Қолаверса, мактабнинг жисмоний тарбия ўқитувчиси Миржаҳон Эшмуродов ҳам ҳаракатини изоҳламаган. Ўқитувчининг отаси ва опаси Миржаҳон Эшмуродов журналистлар билан суҳбатлашишга мажбур эмаслигини билдирган.
Аниқланишича, ҳолат юзасидан Косон туман ИИБ томонидан суриштирув ишлари олиб борилиб, Миржаҳон Эшмуродовга Маъмурий жавобгарлик тўғрисидаги кодекснинг 52-моддаси 2-қисмига (қасддан енгил тан жароҳати етказиш) асосан маъмурий баённома расмийлаштирилиб, чора кўриш учун тўпланган ҳужжатлар Косон туман судига юборилган. Миржаҳон Эшмуродовнинг қилмишини кўриб чиққан суд унга энг кам иш ҳаққининг уч баравари (900 минг сўм)миқдорида жарима белгилаган.
Косон туман халқ таълими бўлими ахборотига кўра, Миржаҳон Эшмуродовга ички меҳнат тартиб-қоидаларини бузганлиги, мансаб йўриқномасида белгиланган хизмат вазифаларини бажаришга масъулиятсизлик билан қараб, хато ва камчиликларга йўл қўйганлиги учун туман халқ таълими бўлими мудирининг буйруғига кўра ҳайфсан интизомий жазо чораси берилган. Мактаб маъмурияти томонидан Миржаҳон Эшмуродовга, унинг фаолияти қайта ўрганиб чиқилиши, агарда иш фаолиятида ушбу ҳолатлар такрорланганда навбатдаги интизомий чора кўрилишини ва меҳнат шартномасини бекор қилишгача бўлган қатъий огоҳлантириш берилган.
Изоҳ (0)