Ижтимоий тармоқларда бир аёл уйдаги ширинликни рухсатсиз еган боласининг қўлини куйдиргани ҳақида хабарлар тарқалди. Ҳолат юзасидан болалар омбудсмани муносабат билдирди.
Унда айтилишича, ҳолат болалар омбудсмани томонидан назоратга олинган. Х.А. (1991 йилда туғилган аёл) 2024 йил 30 октябрь куни 8 ёшли ўғли Б.А. (2016 йилда туғилган) уйдаги ширинликларни рухсатсиз егани сабабли уни гўёки жазолаш мақсадида бармоқлари ораси ва бошқа тана аъзоларига пахта тиқиб, ёққан.
Бунинг натижасида эса бола танасида 1- ва 2-даражадаги куйиш юзага келиб, у енгил тан жароҳати олган.
Олмалиқ шаҳар ИИБ томонидан Х.А.га нисбатан Жиноят кодексининг 110-моддаси (қийнаш) 2-қисми “а” банди бўйича жиноят иши қўзғатилган ва яширингани туфайли унга қидирув эълон қилинган. Жорий йилнинг 7 февраль куни аёл процессуал тартибда ушланиб, унга тегишли суд ажрими асосида қамоқ эҳтиёт чораси қўлланди.
Қайд этилишича, болалар омбудсмани мазкур ҳолат юзасидан бола манфаатлари нуқтайи назаридан ўз кузатувини давом эттиради.
Маълумот учун, Жиноят кодексининг 110-моддаси 2-қисми “а” бандида назарда тутилган жиноят учун 360 соатдан 480 соатгача мажбурий жамоат ишлари ёки 2 йилдан 3 йилгача ахлоқ тузатиш ишлари ёхуд 2 йилдан 5 йилгача озодликни чеклаш ёки 5 йилгача озодликдан маҳрум қилиш жазоси қўлланади.
Аввалроқ Сирдарёда ўқитувчи 1-синф ўқувчисини қўлига игна санчиш билан жазолагани ҳақида хабарлар тарқалганди. Суриштирув давомида юқоридаги ҳолат тасдиғини топмаган. Сирдарёда икки ўқувчи қиз ўқитувчини ургани акс этган видео тарқалди. Ҳолат вилоят Мактабгача ва мактаб таълими бошқармаси ва соҳа масъуллари назоратига олинди.
Қашқадарёнинг Шаҳрисабз туманидаги мактабда ўқитувчи 5-синф ўқувчисини уриб жароҳатлади. Қарши шаҳридаги мактабда ўқитувчи ва ўқувчи ёқалашгани тасвирлари тарқалди. Алгебра фани ўқитувчиси ва 10-синф ўқувчиси бўлган икки қиз ўртасида ўзаро келишмовчилик келиб чиқиб, оғзаки тортишиб қолган. Уларнинг хатти-ҳаракатларига чора кўриш учун судга берилган.
Тошкентдаги мактабда аёл дастлабки иш кунида ўқувчини калтаклагани ҳам кенг муҳокамаларга сабаб бўлганди. Аёл жазоланиб, мактаб директори ишдан олинганди.
Изоҳ (0)