Қуйида Британия қироллик оиласи ҳаётидаги энг фожиали олтита воқеани келтирамиз.
Эдуард VIII нинг тахтдан воз кечиши
Марҳума қиролича Елизавета II амакиси Эдуард VIII нинг қарори туфайли тахт вориси бўлганини доим ёдида тутган. Ҳукмронлигига бир йил ҳам бўлмаган Эдуард VIII тахтдан воз кечиб, Уоллис Симпсон исмли америкалик аёлга уйланишга қарор қилади. Натижада тож унинг укаси — Елизавета II нинг отасига ўтади ва замонавий монархия қиёфаси бутунлай ўзгариб кетади.
Эдвард ва Уоллис Францияга кетиб, турмуш қуради ва Британия сиёсатидан абадий чиқиб кетиб — фақат мавқега эга бўлган оддий одамларга айланишади. Саройда уларни жуда камдан-кам эслашади, чунки бу воқеа қироллик оиласи учун ҳақиқий шармандали ҳолат эди.
Шаҳзода Чарльзнинг хиёнати
Шаҳзода Чарльзнинг Камилла Шанд билан ишқий муносабатлари 1970 йилларда, валиаҳд шаҳзода Диана Спенсер хонимга уйланиш ҳақида хаёлига ҳам келтирмаганида бошланган. Бироқ кейинчалик Чарльз ва Камилла бутун халқнинг нафратига дучор бўлади. Малика Диана 1995 йилдаги шов-шувли интервьюсида шаҳзода ва унинг никоҳида “учинчи шахс” ҳам борлигини айтади. Кутилганлардан фарқли ўлароқ, бўлажак қирол ҳам Паркер-Боулз хоним билан муносабатларини тан олади. Унинг Жонатан Димблби билан очиқ суҳбати Британияни том маънода ҳайратда қолдиради. Шаҳзода Чарльз ва Диана 1992 йилда расман ажрашган пайтдан бошлаб 1996 йилгача бўлган 4 йил кураш ва қасос билан ўтади.
Малика Диананинг ўлими
Ёш, чиройли ва модага қизиқадиган Уэлс маликаси тезда ўз даврининг энг нуфузли аёлларидан бирига айланади. Ҳатто Диананинг нафақат Виндзорлар имижини, балки Британия монархиясининг легитимлигига ҳам таъсир ўтказган энг баҳсли қарорлари ҳам халқнинг унга бўлган муҳаббатига тўсқинлик қилмайди. Одамларда бўлажак қиролнинг хиёнати “халқ маликаси”нинг хиёнатидан кўра кўпроқ нафрат уйғотган.
Малика 1997 йил 31 августда Доди ал-Фаед ҳамроҳлигида Парижда бўлган ва папараццилар таъқибидан қочаётганда уларнинг машинаси автоҳалокатга учрайди. Виндзорлар учун Уэлс маликасининг кутилмаган ўлими ақл бовар қилмайдиган синовга айланади: улар том маънода нима қилишни билмайди, кўплаб хатоларга йўл қўяди ва охир-оқибат бир-бирлари билан жанжаллашади. Қироллик оиласини кечириш, Чарльз ва Диананинг ҳикоясини ўтмишда қолдириш учун жамоатчиликка йиллар керак бўлади.
Шаҳзода Гаррининг шов-шувга сабаб бўлган қилиқлари
Тахт меросхўрининг кенжа ўғли қизлар ва шов-шувли воқеаларга ўралашиб юрадиган, ўткир ичимликларни яхши кўрадиган йигит эди. Алкоголли ичимликлар кўпинча муаммоларга сабаб бўларди. Натижада Чарльз 18 ёшли Гаррини зарарли одатларнинг мумкин бўлган оқибатлари билан таништириш учун атиги бир кунга Featherstone Lodge реабилитация марказига юборишга қарор қилади.
Бироқ жаноби олийларининг жанжаллари ва шов-шувли фотосуратлари шу билан тугамайди. Гарри 20 ёшга тўлганида папараццилар мустамлакачилик услубидаги туғилган кун кечасида шаҳзодани фашистлар кийимида суратга олишга муваффақ бўлади. Бир йил ўтгач эса шаҳзоданинг Вегасда бутунлай яланғоч ҳолдаги суратлари тарқалади. Айтишларича, шаҳзода Меган билан танишгач, спиртли ичимликлар ва жанжаллардан узоқроқ юра бошлаган, аммо Гаррининг эски дўстлари бундан унчалик мамнун бўлмаган.
Шаҳзода Филипп билан содир бўлган ЙТҲ
2019 йилнинг 17 январида Эдинбург герцоги бутун Буюк Британияни ларзага солган бахтсиз ҳодисага учрайди. Бу Сандрингем қироллик мулки яқинида содир бўлади. Ҳазрати олийлари Land Rover ҳайдаб кетаётиб, ичида икки аёл ва чақалоқ бўлган машинага бориб урилади. Филипп полицияга “кўзига қуёш нури тушганини” айтади. Шаҳзоданинг машинаси ҳайдовчи томонига ағдарилиб, олд ойнаси синганди. Машинада герцогнинг қўриқчиси ҳам бўлган.
Яхшиямки, тўққиз ойлик болага ҳеч нарса қилмаган. 28 ёшли Kia ҳайдовчисининг тиззалари жароҳатланган, 45 ёшли йўловчининг билаги синган. Шаҳзода Филипп эса жароҳат олмаган бўлса-да, хавфсизлик камарини тақмагани учун расмий огоҳлантириш олади.
“Мегсит”
Буюк Британиянинг Европа Иттифоқидан чиқиши — “Брексит” номи билан аталган воқеадан кўра “Мегсит” қироллик учун катта зарба бўлади. 2020 йил январь ойида шаҳзода Гарри ва унинг рафиқаси Меган қироллик оиласидан чиқиб кетиш истагини билдиради. Улар энди расмий вазифаларни бажаришни хоҳламасликларини айтиб, қироллик сулоласининг фаол аъзолари сифатидаги мақомларидан воз кечишни афзал кўради. Ўша йилнинг 1 апрелидан бошлаб Сассекс герцогиняси ва герцоги “молиявий жиҳатдан мустақил” деб эълон қилинади ҳамда улар қироллик мажбурият ва имтиёзларидан озод қилинади.
Қарор эълон қилинган пайтда Гарри, Меган ва уларнинг бир ёшли ўғли Арчи Канадада эди, кейин оила АҚШга кўчиб ўтади. Афтидан, шаҳзода бувиси, отаси, бир кун келиб Британия тожини мерос қилиб оладиган акаси ёки бошқа қариндошлари билан маслаҳатлашмаган. Виндзорларни энг кўп хафа қилгани шаҳзоданинг уларга нисбатан “ҳурматсизлиги” эди. Матбуотда Сассекс мухлислари ва қиролликнинг бошқа аъзолари мухлислари ўртасида ҳақиқий жанжаллар бўлиб ўтади ва бу гап-сўзлар бугунги кунгача тўхтамаган.
Изоҳ (0)