Қадимий инглиз ва шотланд оиласидан бўлган оқсуяк аристократ, волонтёр, Буюк Британия Коммунистик партияси аъзоси, замонавий санъат ишқибози, икки эгизак фарзанднинг онаси, ноодатий кўринишга эга ғайриоддий шахс ва ниҳоят, халқаро кинофестиваллар ҳамда “Оскар” совриндори. Буларнинг ҳаммаси бир киши — 62 ёшли британиялик актриса Кетрин Матильда (Тильда) Суинтон ҳақида.
Жаҳон кинематографиясига кириб келиши
Жонли образлар, янги ўзгаришлар, ўзгарувчан интонациялар — истеъдодига қарамай, актриса нафақат бош қаҳрамонларни, балки кичик эпизодларни ҳам ўйнайди. У ҳамма жойда эсга олинади. Шу билан бирга, роли ишонарли чиқиши учун жонини бериб ишлайди.
Ташқи кўриниши мутлақо хотиржам, лекин ичида нафрат ёки муҳаббат ёнаётган қаҳрамон образини фақатгина Тильда Суинтон яратиши мумкин.
Кино ва роллар
Бир нечта телевизион фильмларда ишлагандан сўнг, актриса авангард қарашларга эга режиссёр Жарманнинг “Караважо” фильмида бош ролни ўйнаган ҳолда катта кинога қадам қўяди.
Режиссёр ва актрисанинг бошқалардан фарқли фикрлари бир-бирига тўғри келди. Улар умумий тил топиш олди ва Суинтон режиссёрнинг яна тўққизта фильмида рол ўйнади.
“Мен ҳеч қачон рол ҳам, фильм ҳам танламаганман, мен фақат ҳамкасблар излаганман. Фильмда суратга тушаётганингизда, йиллар давом этадиган муносабатларга киришасиз”, — дейди актриса Esquire нашрига берган интервьюсида.
2000 йилда “Пляж” саргузашт триллери чиқди, унда Леонардо Ди Каприо актрисанинг партнёри бўлди. Бу фильм Тильдага Голливуд учун йўл очди. Совринлар ва нуфузли кино мукофотлари билан нишонланган узоқ ижодкорлик марафони бошланди.
2008 йилда актриса “Майкл Клейтон” фильмидаги иккинчи пландаги энг яхши актриса номинациясида “Оскар”га сазовор бўлди, аммо ҳайкал унинг учун деярли ҳеч нарсани англатмади.
“Мен Жорж Клунини ҳар бир шартномага киритишга ҳаракат қиламан. Бу осон иш эмас, лекин қўлимдан келганини қиламан. Аммо улар менга тасалли сифатида Бред Питтни беришади”, деб ҳазиллашади актриса.
Муваффақиятига қарамай, Тильда ўзини ҳали ҳам профессионал актриса деб ҳисобламайди. Шу билан бирга, у кино таклифларга дарҳол рози бўлишга шошилмайди. Фаолиятининг бошида Суинтон ҳар доим таклиф қилинган фильмда рол ўйнаш ёки ўйнамасликни ўзи ҳал қилган.
Айтганча, у эркак қаҳрамонларни ҳам жуда яхши ижро этган. Бунда унга баланд бўйи ва ташқи кўриниши ёрдам берган.
У Голливуддаги энг ғайриоддий актриса ҳисобланади: ташқи кўринишидан тортиб ҳаётий қарашларигача.
Қадимий оиладан чиққан аристократ
Актрисанинг насл-насаби XI асрга бориб тақалади — Суинтон хоним.
Қиз ўз тақдирини билар эди: Кембрижни тугатиб, герцогга билан турмушга чиқиш. Буни ўзи хоҳлагани учун эмас. Бу шунчаки аристократик жамиятнинг мантиғи ва анъанаси билан боғлиқ.
У чинакам инглизча тарбия олади, унинг моҳияти шундаки, беш ёшгача боланинг овози чиқмаслиги керак, беш ёшдан кейин эса ўзи ҳам кўринмагани маъқул.
Тильданинг эрта болалик даври ёпиқ нуфузли мактабда ўтади. Ҳаммаси одатдагидек эди.
“Ота-онамни қилган ҳамма ишлари учун кечира оламан, фақат мени хусусий мактабга берганларидан ташқари. У ерда мусиқа тинглашга рухсат беришмасди. Бу ёшларга, айниқса, ўсмирларга нисбатан ҳақиқий зўравонлик эди... Бу мен ҳалигача ҳазил қила олмайдиган ягона нарса”.
Табиийки, ёпиқ мактаб мустақил ва эркинликни севувчи Тильда учун қийин давр бўлади. Аммо у бу ерда чидамлиликни ўрганади. Қизиғи шундаки, Суинтоннинг синфдоши бўлажак малика Диана Спенсер эди.
Мактабдан кейин — коллежда ўқиш, Африкада ўқитувчи сифатида кўнгилли бўлиб ишлаш. Ва кейин Кембриж университети коллежида саҳна билан танишиш бўлди. Кўп ўтмай, театрдан ташқари, кинога ҳам қадам қўйди. Шундай қилиб, санъат олами унга элита жамиятидан кўра кўпроқ мафтун этди.
Шахсий ҳаёт
Тилда шахсий ҳаётини реклама қилишни ёқтирадиганлардан эмас. Шунинг учун у ҳақидаги маълумотлар жуда кам. Актриса шотландиялик рассом Жон Бирн билан 1986 йилда танишган. Турмуш ўртоғи ундан 20 ёш катта. Орадан 11 йил ўтиб, оилада эгизаклар дунёга келди.
“Эгизакларим туғилганда дунёга янгидан келгандек бўлдим. Дангасаликни йиғиштирдим. Бир неча йилдан бери бир сония ҳам бўш вақтим йўқ”, — дейди меҳрибон она.
Унчалик чиройли бўлмаган гўзал
У гўзал деб аташ мумкин бўлмаган ноёб одамлардан бири, лекин негадир ундан кўз узолмайсиз. Агар актрисанинг кучли истеъдодини ноодатий кўринишига ва унинг улкан харизмасига қўшсангиз, шунчаки сеҳрли улуғворликни кўрасиз.
“Мен доим хунук эканлигимни билардим. Бу катта афзаллик. Барча чиройли танишларим эртами-кечми гўзаллигини йўқотади. Улар ҳар доим сариқ сочлари, кўк кўзлари, чиройли лаблари борлигини эслайди ва шунга мос бўлишга ҳаракат қилади. Бу нарса мени жуда кўп босимдан қутқарган”.
Ёшлигиданоқ ўзини гўзал деб ҳисобламаслигини англаган Тильда беҳуда умидлардан ва жамоатчилик фикрига боғлиқликдан ички эркинликни ҳис қилади.
У ўзини қандай кўрсатишни билади — кучли шахсият, нафис, ҳайкалдек совуқ юз ва деярли макияжсиз кўриниш.
Эҳтимол, у соддароқ ва бир оз аҳмоқроқ бўлганида пластик жарроҳ ёрдами билан малласоч нозанинга айланиши мумкин эди. У қўғирчоқ фабрикасидаги конвеер маҳсулотларидек кўринадиган соҳибжамол, аммо сунъий гўзаллар қаторига қўшиларди. Аммо Тильда Суинтон ўшандаёқ ўзлигини кўмган бўларди.
Ҳозирда актриса ўз уйида ўзининг севимли одами, итлари, сабзавот боғи ва бир кунда йиғилиб, икки ойлаб қоладиган дўстлари билан бахтли. У ёшига эътибор бермайди, қариб қолишдан қўрқмайди ҳам. Ва энг муҳими, у ўтмишга ёпишмасдан, ҳозирги кун билан яшайди.
Изоҳ (0)