Буюк Британия қироли Чарльз III нинг рафиқаси қиролича Камилла янги Барбининг юзига айланди. Ўйинчоқлар ишлаб чиқарадиган компания — Mattel’нинг вакили Букингем саройидаги зиёфатда қиролича шарафига яратилган қўғирчоқни совға қилди. Бу ҳақда “Правила Жизни” нашри хабар қилмоқда.
Mattel компанияси қиролича Камилла намунасидаги қўғирчоқ учун худди ҳаётдагидек образни яратди: янги Барби устида кўк кўйлак ва қора палто бўлиб, унга заргарлик буюмларининг кичрайтирилган нусхаси билан безак берилган.
Нашрнинг ёзишича, Камиллага қўғирчоқ совға қилишганда у кулгидан ўзини тия олмади ва “дизайнерлар мени тахминан 50 ёшга ёшартириб юборибди, — деб ҳазиллашди. — Сизга катта раҳмат, бундай ажойиб совға учун сиздан миннатдорман”, — деди у. Меҳмонларга қарата қиролича қўшимча қилди:
“Барчанинг уйида Барби бўлиши шарт!”
Барбининг Instagram’даги расмий аккаунти ҳам янги қўғирчоқ ҳақида эълон берди. Постда “Барби қиролича ҳазратлари WOW (World оf women — Аёллар дунёси) ҳаракатидаги етакчилигини эътироф этиб, уни ўзига хос қўғирчоқ билан шарафлайди”, деб ёзиб қолдирилган.
Бироқ постдаги изоҳларда фойдаланувчилар Mattel’ни қаттиқ танқид қилган. Масалан, “Камилла қироллик оиласига генетик жиҳатдан боғлиқ эмас”, “Янги Барби Mattel’нинг қадриятларига зид”, “Камилла қизлар учун ўрнак бўладиган қиролича эмас” каби изоҳлар қолдирилди.
Фойдаланувчилар, шунингдек, марҳума малика Диана шарафига ҳали ҳам Барби яратилмаганини эслашди. Шунингдек, Кейт Миддлтон яқинда жарроҳлик амалиётини ўтказган вақтда бундай қилиш ахлоқсизлик деб баҳолашди.
Чарльз III 1996 йилда малика Диана билан ажрашиб, Камиллага уйланганидан бери унга нисбатан кўплаб салбий фикрлар ёғилиши тўхтамаган.
Изоҳ (0)