Буюк Британия консорциуми Ўзбекистонда транспорт ва энергетика соҳаларидаги лойиҳаларни амалга оширади

Ўзбекистон элчиси Равшан Усманов Буюк Британиянинг Arup консорциуми бошқарув раиси Жером Фрост билан учрашув ўтказди.

1946 йилда Лондонда асос солинган Arup компанияси лойиҳалаш ва қурилишни режалаштириш ҳамда уларни барча босқичларида бошқариш соҳаларида дунёдаги йирик муҳандислик консорциуми ҳисобланади. Компания дунёнинг 140 дан ортиқ давлат билан ҳамкорлик қилади ва унинг 37 та мамлакатда ўз офислари бор.

Arup компанияси томонидан лойиҳалаштирилган ва амалга оширилган бир қатор объектлар ўзининг юқори технологик муҳандислик ечимлари ва ноёб дизайни билан машҳур. Сидней опера театри, Лондондаги “Макмиллан” рак касалликларини даволаш маркази ва Standart Hotel меҳмонхонаси, Бирмингемдаги Paradise Square бизнес маркази, Пекиндаги Parkview Green FangDaoDi ва Абу-Даби шаҳридаги Yas Island Marina Hotel меҳмонхоналари, Москвадаги “Сколково” технопарки ва Мадриддаги Hospital de Mostoles шифохонаси шулар жумласидандир.

Жером Фрост Arup компанияси Ўзбекистон томони билан сермаҳсул ҳамкорлик қилиб келаётганлиги ва шу кунгача республикада 15 та хусусий ва давлат секторидаги мижозлар билан 30 дан ортиқ лойиҳаларни муваффақиятли амалга оширганлигини маълум қилди.

Arup компанияси томонидан Самарқанд туризм маркази, шу жумладан, Конгресс-ҳолл ва 8 та меҳмонхона, Tashkent City ишбилармонлик ҳудудидаги Конгресс-ҳолл ва Hilton меҳмонхонаси, Ўзбекистон миллий кутубхонаси, шунингдек, бир қатор транспорт ва энергетика инфратузилмаларини қуриш бўйича лойиҳалаш ва муҳандислик хизматлари кўрсатилган.

консорциум бошқарув раиси Жером Фрост компания Ўзбекистон билан ҳамкорликни кенгайтиришдан манфаатдор эканлигини тасдиқлади.

Учрашув якунида Arup компанияси билан ҳамкорликда мамлакатимизда йирик иншоотларни, шу жумладан, транспорт ва энергетика соҳаларида қўшма лойиҳаларни амалга ошириш бўйича келишувга эришилди.