Hayotining so‘nggi yillarida Diana muxlislariga Charlz uni hech qachon sevmaganini tez-tez aytib o‘tardi. Ehtimol, malika chindan ham shunday deb o‘ylagan yoki hammaning shunday deb o‘ylashini istagan bo‘lishi mumkin. Shu bilan birga, Charlzning yaqin do‘stlari ishonch bilan aytishadi: u Diana bilan mustahkam oila qurishga chin dildan harakat qilgan, ammo hamma narsa ularga qarshi bo‘lgan.
Bo‘lajak xotini bilan uchrashishidan oldin Charlz allaqachon sevib qolgandi. Kamilla Parker-Boulzga bo‘lgan hislar shahzodaning armiyadagi uzoq xizmatidan so‘ng ham so‘nmaydi. Biroq Vindzorlar bu nikohga qat’iyan qarshi edilar. Kamillaning ziddiyatli obro‘si uning valiahd shahzodaga turmushga chiqishiga yo‘l qo‘ymasdi. Shundan so‘ng Charlzning hayotiga Diana kirib keladi.
Nufuzli zodagon oiladan chiqqan yosh qiz Vindzorlar uchun g‘oyat mos edi. Diana bolaligidan shovqinli Londondan uzoqda, Spenserlarning oilaviy mulkida ulg‘aygan. Qirollik oilasi shahzoda uchun bundan yaxshiroq juft topish mushkul degan qarorga keladi. Diana ham malika bo‘lishidan mamnun edi. 19 yoshli qiz bo‘lajak eri va uning oilasiga yoqishga qo‘lidan kelgancha harakat qilardi.
Ammo 1981-yildagi to‘ydan ko‘p o‘tmay, er-xotin o‘rtasida dastlabki tushunmovchiliklar yuzaga kela boshlaydi. Ma’lum bo‘lishicha, Diana aslida boshqacha xarakterga ega ekan. To‘ydan oldin u Charlzga o‘zi ham xuddi u kabi tabiat qo‘ynida bo‘lishni yoqtirishini ta’kidlaydi. Ammo turmushining birinchi yilidayoq Diana Shotlandiyadagi Balmoral mulki va ovchilikni yomon ko‘rishini aytadi. Ma’lum bo‘lishicha, malika qirollik oilasiga o‘zining tabiatga bo‘lgan muhabbati haqida gapirganda shunchaki hazillashgan ekan.
Diana bilan ko‘p muloqotda bo‘lgan Balmoral xodimlaridan birining fikricha, bu arzimas yolg‘on er-xotin o‘rtasidagi ishonchni yo‘q qilgan. U qirollik muxbiri Tom Kuinnga shunday deydi:
“Menimcha, bu ularning munosabatlari yomonlashuvining boshlanishi bo‘ldi, odamlar ularning ajralishi boshqa ayol tufayli bo‘lgani haqida qanchalik ko‘p gapirsalar ham, kichik yolg‘on o‘z ta’sirini o‘tkazgandi”.
Izoh (0)