Иордания қироли Абдулла II АҚШ президенти Дональд Трамп билан учрашувда Ғазо секторидан 2 минг нафар болани олиб кетишини айтди. Бу ҳақда Неw Ёрк Пост хабар берди.
Давлат раҳбарлари ўртасидаги учрашув 11 февраль куни бўлиб ўтди. Трамп Ғазо секторидан фаластинликларни кўчириш режаси доирасида Иордания қиролини уларни қабул қилишга чақирди. АҚШ президенти фаластинликларни кўчириш ва секторни “Яқин Шарқ дарёси”га айлантириш ғоясидан воз кечмаслигини айтди.
“Биз бу (жойни) қўлга киритмоқчимиз. Уни сақлаб қолиб, қайта тиклашни режалаштирмоқдамиз. Охир-оқибат, Яқин Шарқдаги одамлар учун кўплаб иш ўринларини яратмоқчимиз”, деди Трамп ва ўз режаси минтақага “тинчлик олиб келишини” даъво қилди.
Иордания қироли суҳбатда аҳволи оғир ва жиддий касалликка чалинган фаластинлик болаларни қабул қилишга тайёрлигини билдирди.
“Ҳозир қила оладиган ишларимиздан бири — саратон касаллигига чалинган ёки жуда оғир аҳволда бўлган 2000 болани имкон қадар тезроқ Иорданияга олиб кетишдир”, деди Абдулла II.
АҚШ президенти бундай қарор учун миннатдорлик билдирди. Трампнинг таъкидлашича, Иордания ва Миср охир-оқибат Ғазодан кўчирилган аҳолини қабул қилишга рози бўлади. Иккала давлат ҳам иқтисодий ва ҳарбий ёрдам борасида Вашингтонга таянади.
“Бизда Иорданияда ер участкаси бўлишига ишонаман. Мисрда ҳам ер участкаси бўлишига ишонаман. Бошқа жойлар ҳам бўлиши мумкин, лекин музокараларимиз якунлангандан сўнг, улар жуда бахтли ва хавфсиз яшайдиган жойга эга бўламиз деб ўйлайман”, деб тушунтирди Трамп.
У Иорданияга кўрсатилаётган ёрдамдан таҳдид сифатида фойдаланмоқчи эмаслигини айтди.
“Биз Иорданияга ва, айтганча, Мисрга ҳам катта миқдорда маблағ сарфламоқдамиз. Аммо бу билан таҳдид қилишни зарур деб ҳисобламайман. Менимча, биз бундан юқорироқ даражадамиз”, деди АҚШ президенти.
Трамп: “АҚШ Ғазо секторини бошқаради”
АҚШ президенти Ғазо секторини “снос” майдончаси деб атаганди. У анклав аҳолисини турли мамлакатларга, жумладан, Иордания ва Мисрга кўчириб ўтказиш мумкинлигини айтган. У Қўшма Штатлар бу жараённи молиялаштирмаслиги, чунки харажатларни қоплашга Яқин Шарқ давлатларининг қурби етишини таъкидлаганди. Вашингтон эса минтақадаги ишлар учун жавобгар бўлади ва зарурат туғилганда у ерга ўз қўшинларини юбориши мумкинлигини айтган.
Ушбу таклифга жавобан араб давлатлари етакчилари АҚШ давлат котибига мактуб йўллаб, фаластинликларни чиқариб юборишга йўл қўйиб бўлмаслиги, буни нафақат халқаро ҳуқуқнинг бузилиши, балки минтақавий хавфсизликка таҳдид деб атаган.
Изоҳ (0)