Ижтимоий тармоқлардаги баъзи каналларда 20 тонна помидор Россиядан Ўзбекистонга қайтарилгани тўғрисида хабарлар тарқалди. Қишлоқ хўжалиги вазирлиги ҳолатга изоҳ берди.
Россиянинг Свердловск вилоятидаги Екатеринбург шаҳрида жойлашган вақтинчалик омборда сақланаётган 20 тонна помидор маҳсулотида помидор жигарранг бужмайиш вируси (Томато броwн ругосе фруит вирус) аниқлангани туфайли маҳсулот Ўзбекистонга қайтарилаётгани маълум қилинган.
Қишлоқ хўжалиги вазирлигига кўра, айни пайтда вазирлик ҳузуридаги Ўсимликлар карантини ва ҳимояси агентлиги мутасаддилари ҳамда Россиядаги масъул ташкилотлар ҳолат юзасидан помидор маҳсулотларининг экспертизасини олиб бормоқда. Шунингдек, фитосанитария сертификатлари ҳам текширувдан ўтказилмоқда.
“Помидор жигарранг бужмайиш вируси касаллиги” республика ҳудудларида тарқалишига қарши чоралар
Ўзбекистонда 2023 йилнинг 1 ярим йиллигида помидор ва қалампир маҳсулотларининг янги “Помидор жигарранг бужмайиш вируси касаллиги” республика ҳудудларида тарқалишига қарши чоралар кўрилиб, экспортга қўйилган чекловлар бартараф қилинишига эришилди. Фитосанитар талабларга жавоб бермагани сабабли 14 та давлатга 143 та эътирознома (нотификация) юборилди. 9 000 дона зарарланган импорт маҳсулотлари экспортёр давлатларга қайтарилди.
Бу қандай вирус?
Маълумот учун жигарранг бужмайиш вируси ўсимликларда учрайдиган касалликлардан биридир, хусусан помидор ўсимликларида кўпроқ кузатилади. Бу касалликнинг аломатларига мозаика сингари баргларнинг ранг-паранг бўлиши, ўсимликларнинг ривожланишида секинлашиш ва меваларнинг бузилишини санаб ўтиш мумкин.
Касалликнинг даражаси помидор навларига қараб енгил ёки оғир бўлиши мумкин. Вирус касалликлари билан курашиш ўсимликни қўзиқоринлар ва зараркунандалар ҳужумидан ҳимоялаш, шўрланиш ёки ҳаддан ташқари сув беришдан сақланиш ва касалланган ўсимлик қисмларини ўз вақтида йўқ қилиш каби агротехник чора-тадбирларни ўз ичига олади.
Изоҳ (0)