Ўтган йили 10 842 нафар ўзбекистонлик хорижий давлатларга доимий яшаш учун кўчиб кетган. Бу ҳақда Статистика агентлиги маълум қилди.
2024 йилда Ўзбекистондан чет элга кўчиб кетганларнинг асосий қисми Қозоғистон (8 792 киши) ва Россияга (1 601 киши) борган. Шу билан бирга, мамлакатни тарк этганлар улуши Жанубий Корея (96 киши), Қирғизистон (73 киши), Туркманистон (39 киши) ва бошқа мамлакатлар (241 киши) ҳиссасига тўғри келган.
Таққослаш учун, 2023 йилда хорижга доимий яшаш мақсадида кўчиб кетган ўзбекистонликлар сони ўтган йилдагидан сезиларли кўп (17 336 киши) бўлган. Жумладан, Қозоғистоннинг ўзига 14 051 киши, Россияга 2 670 киши кўчиб кетган.
Бундан 15 йил илгари, яъни 2010 йилда Ўзбекистондан хорижга 44 420 киши, 2011 йилда 50 816 киши, 2012 йилда 45 447 киши кўчиб кетган. 2015 йилдан четга кўчиш тренди сезиларли пасая бошлаган (31 765 киши кўчган).
2024 йилда Ўзбекистонга хорижий мамлакатлардан доимий яшаш мақсадида кўчиб келганлар сони 2 229 кишини ташкил этган. Шундан 813 нафари Россиядан, 539 нафари Қозоғистондан бўлган. Шу билан бирга, мамлакатга Тожикистондан 241 киши, Қирғизистондан 153 киши доимий яшаш учун кўчган.
Таққослаш учун, 2023 йилда республикага чет элдан 2 955 киши кўчиб келганди. Шундан 1 175 нафари Россиядан, 726 нафари Қозоғистондан бўлган.
Изоҳ (0)