Ўтган йилда чет элда ота-она қарамоғисиз қолиб кетган 43 нафар бола Ўзбекистонга қайтариб олиб келинди. Бу ҳақда Олий Мажлиснинг Инсон ҳуқуқлари бўйича вакили ахборот хизмати раҳбари Фотима Мадраҳимова маълум қилди.
Унинг билдиришича, Бола ҳуқуқлари бўйича вакил томонидан чет элда ота-она қарамоғисиз қолиб кетган болаларни Ўзбекистонда қайтаришда Ички ишлар вазирлиги билан кенг ҳамкорлик қилинмоқда. 2022 йил давомида Россиядан жами 37 нафар, Қозоғистондан 4 нафар, Туркиядан 2 нафар вояга етмаганлар — жами 43 нафар бола Ўзбекистонга қайтариб олиб келинди.
Ўзбекистоннинг болалар ва аёлларни низоли ҳудудлардан олиб келиш ва уларни жамиятга мослаштириш бўйича тажрибаси халқаро миқёсда эътироф этилмоқда. Ушбу тажрибани ўрганиш мақсадида Ўзбекистонга Қирғизистон, Туркманистон, Малдив Республикаларининг делегациялари ташриф буюрди.
Йил давомида Россия ва Қозоғистон Бола ҳуқуқлари бўйича вакиллари томонидан 15 та мурожаат қабул қилиниб, барчаси ижобий ҳал этилган.
2022 йил мобайнида Бола ҳуқуқлари бўйича вакил номига бола ҳуқуқлари ва қонуний манфаатлари бузилиши тўғрисида жисмоний ва юридик шахслар, болалар ҳамда улар қонуний вакиллари томонидан жами 696 та мурожаат қабул қилинган. Шулардан 64 та мурожаат қаноатлантирилган, 310 та мурожаат юзасидан ҳуқуқий тушунтириш берилган.
Алимент олиш ҳуқуқига доир 29 та мурожаатни ўрганиш давомида 2022 йил давомида Бош прокуратура томонидан 71 нафар тарбияланувчига ота-оналаридан 389,3 миллион сўм алимент ундириб берилиши таъминланган.
2021—2022 йилларда жами ота-она қарамоғидан маҳрум бўлган болаларга мўлжалланган 21 та болалар муассасаси фаолияти тугатилган.
Қайд этилишича, айни пайтда Республика бўйича жами 139 та оилавий болалар уйи ташкил этилган бўлиб, уларда 822 нафар болалар тарбияланмоқда.
Эслатиб ўтамиз, эндиликда Ўзбекистонда “Бола ҳуқуқларининг кафолатлари тўғрисида”ги қонунга киритилаётган ўзгаришга кўра боланинг отаси, онаси ёки уларнинг ўрнини босувчи шахс чет давлатда болани назоратсиз қолдириш, яъни ота-онанинг, улар ўрнини босувчи шахснинг болага таъминот, тарбия ва таълим бериш бўйича ўз мажбуриятларини бажаришдан бўйин товлаши қонунчиликка мувофиқ жавобгарликка сабаб бўлади.
Изоҳ (0)