Кўп қаватли уйларнинг техник паспортлари ҳам ишлаб чиқилади. Шу асосда барча уйлар ҳолатини аниқ кўриш мумкин бўлган электрон база ишга туширилади ҳамда таъмирланадиган ёки реновацияга тушадиган уйлар рўйхати шакллантирилади. Бу ҳақда Қурилиш ва уй-жой коммунал хўжалиги вазирлигида бўлиб ўтган матбуот анжуманида маълум қилинди, дея хабар бермоқда “Дарё” мухбири.
Таъкидланишича, бунинг учун дастлаб 1991 йилгача қурилган уйлар хатловдан ўтказилиб, техник паспортлари яратилади. Ушбу паспортлар асосида таъмирланадиган ёки реновацияга тушадиган уйлар рўйхати шакллантирилади. Шунингдек, кўп қаватли уйларни бошқариш тизими ҳам тўлиқ рақамлаштирилиб, умумий йиғилишлар, ҳисоботлар, мурожаатлар ва диспетчерлик хизматлари рақамли кўринишга ўтказилади.
Аҳолининг мурожаатлари тўлиқ “Менинг уйим” тизими орқали бошқарув сервис компанияларига юборилади ва вазирлик томонидан уларнинг ижроси кузатиб борилади.
Бундан ташқари, кўп квартирали уйларнинг лифтларини бошқариш ва мониторинг қилиш бўйича “Хавфсиз лифт” ягона идоралараро платформаси ишлаб чиқилмоқда.
Бугунга қадар кўп қаватли уйлардаги 8 942 та лифт техник кўрикдан ўтказилиб, улар бўйича паспорт ва мувофиқлик сертификати жорий этилади. Шу асосда келгуси 5 йилда 2 001 та лифт янгиланади ва 382 таси таъмирланади.
Аввалроқ ҳар бир қурилаётган объектнинг кўриниш жойига буюртмачи ёки қурувчи томонидан илиб қўйилган QR код орқали қурилиш жараёнлари билан яқиндан танишиш имкониятига эга бўлиш мумкинлиги айтилганди. Шунингдек, Ўзбекистонда қурилиши якунланган объектларни фойдаланишга қабул қилиш тўлиқ рақамлаштирилиши ҳақида хабар берилганди.
Изоҳ (0)