Ўзбекистонда биринчи марта 2023 йил 1 декабрдан бошлаб Олмалиқ архитектура-қурилиш техникумида кўп қаватли уйларга хизмат кўрсатувчи усталарни ўқитувчи икки йиллик дастур очилмоқда. Унга бир гуруҳ ўрганувчилар танлаб олинган.
“Замонавий иш берувчилар талаблари ва хорижлик экспертлар тавсиялари асосида тузилган ўқув дастури икки йил ичида 4-малака даражасига эга хаус мастер, яъни кўп қаватли уйларда бир нечта муҳим устачилик ишларини қила олувчи мутахассис тайёрлаймиз. Дастурга 100 фоиз давлат грант ажратган. Битирувчилар нафақат Олмалиқ ва унинг атрофидаги ҳудудлар, балки Тошкент, ҳатто чет тилни эгаллаган бўлса хорижда ҳам ушбу ўта муҳим касб билан шуғулланиши мумкин бўлади”, – дейди Олмалиқдаги техникум директори Соҳиба Мирзакаримова.
Бу ҳақда ушбу ташаббус ҳаётга татбиқ қилинишига сабабчи бўлган Европа Иттифоқининг Promhouse лойиҳаси якунларига бағишланган конференцияда маълум қилинди. Халқаро анжуманда Европа Иттифоқининг Қозоғистон ва Ўзбекистондаги ваколатхоналари масъуллари, Promhouse лойиҳаси ҳамкор давлатларининг ихтисослашган вазирлик ва идоралари вакиллари, соҳа мутахассислари, экспертлар иштирок этди.
2020-2023 йилларда амалга оширилган лойиҳа давомида профессионал таълим муассасаларида соҳа учун керакли касбларга ўқитиш йўлга қўйилди, балки Training of Trainers (ToT) таълим дастури амалга оширилди. У 256 академик соатга мўлжалланган бўлиб, ўқитувчилар 9 та мамлакат Германия, Қозоғистон, Ўзбекистон, Молдова, Беларусь, Украина, Латвия, Литва ва Эстониядан жалб қилинди. Дастурда лойиҳанинг ҳамкор мамлакатлари уй-жой хўжалигининг 1300 га яқин мутахассислари иштирок этди. Тренинг “уй-жойларни бошқариш”, “рақамлаштириш”, “турар жой биноларида энергия самарадорлиги”, “уй устаси”, “касбий тайёргарликни ташкил этиш”, “коммуникация” модуллар бўйича ўтказилди.
Лойиҳанинг кўплаб иштирокчилари минтақавий тажриба алмашишни (3 та конференция, Қозоғистон ва Ўзбекистонга 2 та таълим сафари, Германия ва Эстонияга 2 та таълим сафари) ижобий эътироф этди. Лойиҳа уй-жой соҳасида тажриба алмашиш Марказий Осиё учун қанчалик муҳимлигини кўрсатгани алоҳида таъкидланди.
“Томдан чакки ўтиши, сув ва канализация қувурларидаги носозликлар, лифт ишламай қолиши. Кўп қаватли турар-жой биноларида кузатиладиган шу каби ҳолатлар уйларни бошқарувчи компаниялар томонидан бартараф қилиниши керак. Собиқ совет мамлакатларида бундай ширкатларни аҳоли вакилларидан иборат жамоа юритади”, – дейди Шарқий Европада Уй-Жой Ташаббусининг (IWО) (Германия) Марказий Осиё бўйича лойиҳа директори Лариса Шреккенбах. Европа Иттифоқининг куни кеча якунланган уч йиллик Promhouse лойиҳасига консултантлик қилган германиялик экспертга кўра, муаммолар ва зиддиятлар кам бўлиши, аҳоли қулай ва ташвишсиз уйда яшаши учун коммунал хўжалиги ходимлари профессионал бўлиши, ўз вазифасини бажариш учун махсус билим ва компетенсияларга эга бўлиши зарур.
“Бу каби Европа лойиҳалари кўпроқ бўлиши керак. Promhouse нафақат Германиядан, балки 90 йилларда уй-жой фондида Ўзбекистондагига ўхшаш ҳолатда бўлган Шарқий Европа мамлакатларидан тажриба ва ноу-хауларни ўзлаштириш имкониятини беради, – дейди Ўзбекистондаги кўп қаватли уйларга оид энг йирик ассосиация бўлмиш Uyushma.uz раҳбари Раҳима Ортиқова. – Бу соҳада амалга ошириладиган ишлар ҳали кўп. Мавжуд эҳтиёж ва Ўзбекистондаги мутасаддиларнинг хайрихоҳлиги, хорижлик ҳамкорларнинг қўллови билан ҳар бир инсон учун энг муҳим мавзу – уйларимиз аҳволи яхшилигига хизмат қиладиган мутахассисларни тайёрлашда давом этамиз”.
Лойиҳа якунларига бағишланган конференцияда мутахассислар кўп қаватли уйларни бошқариш соҳасидаги кадрлар масаласи йўлаклардаги энг фаол қўшниларга масъулиятни юклаб қўйиш орқали эмас, техникум ва университетларда уларни тизимли тайёрлаш, салоҳиятни оширувчи ўқув дастурлари орқали ҳал қилиниши кераклигини алоҳида таъкидлади.
Изоҳ (0)