Тошкентда хусусий уй ўрнига қурилаётган кўп қаватли бинони бузиш ишлари бошланди

Тошкент шаҳар Чилонзор туманида ноқонуний қурилган кўп қаватли бинони бузиш ишлари бошланди, деб хабар беради пойтахт ҳокимлиги матбуот хизмати.

Қайд этилишича, Мажбурий ижро бюроси Чилонзор тумани бўлимига суд ижро варақаси келиб тушган. Унда Чилонзор тумани Дўмбиробод 2-тор кўча 10-уйда қурилаётган ноқонуний қурилмани фуқаро И.М. ҳисобидан бузиш белгиланган. Бироқ фуқаро огоҳлантиришлар, маъмурий жарималарга қарамай, суд қарори ижросини таъминламаган.

Аниқланишича, фуқаро хусусий уй ўрнига кўп қаватли бино қурган. Қурилиш ишлари белгиланган меъёрларни қўпол равишда бузган ҳолда олиб борилган. Маҳаллий аҳоли 2019 йилдан бери ҳолат бўйича чора кўрилишини сўраб турли идораларга мурожаат қилган. Қурилаётган бино атрофдаги уй-жойларга қуёш тушиши, шамол айланишига халақит бермоқда.

“Бошида биздан икки қаватли турар жойи бўлади деб рухсат олган. Лекин ҳозирда улар 4-5 қаватли дом қурган”, — дейди фуқаролардан бири.

Натижада суд ноқонуний қурилган бинони бузиш тўғрисида қарор чиқарган. 20 февралдан ноқонуний қурилган бинони бузиш ишлари бошланган.