Нохуш ҳолат рўй берган лифт белгиланган тартибда давлат рўйхатидан ўтказилмагани ва фойдаланишга қабул қилинмагани аниқланди — Қурилиш вазирлиги

Тошкент шаҳрининг Паркент кўчасида жойлашган турар жой биносидаги лифтда одамлар ҳаёти учун хавфли бўлган воқеа юз бергани хабар қилинганди.

Мазкур турар жой биносида яшовчи фуқаронинг хабар қилишича, 24 октябрь куни ичида одамлари бўлган лифт 9-қаватдан тушаётганда кескин тезлашган, 5-қаватга яқинлашганда эса автоматик тормоз тизими ишга тушган.

Мазкур воқеа Қурилиш ва уй-жой коммунал хўжалиги вазирлиги назорат инспекцияси, Тоғ-кон, геология ва саноат хавфсизлигини назорат қилиш инспекцияси, ҳокимлик ҳамда мазкур кўп қаватли уйларга хизмат кўрсатувчи “Уют комфорт коммунал” бошқарув сервис компанияси вакилларидан ташкил топган ишчи гуруҳ томонидан ўрганилди.

Унга кўра кўтариш қурилмаси белгиланган тартибда давлат рўйхатидан ўтказилмаганлиги ва фойдаланишга қабул қилинмаганлиги аниқланди. Шунингдек, лифтда тегишли тартибда даврий синов ишлари амалга оширилмаган. Мазкур лифтга техник хизмат кўрсатиш бўйича махсус ташкилот билан шартнома тузилмаган ҳамда лифтни соз ҳолатда сақлаш, уни бехатар ишлатиш бўйича жавобгар шахс тайинланмаган.

“2020 йилда ишлаб чиқарилган, кўтариш оғирлиги 1000 кг бўлган лифт қурилмасига белгиланган тартибда техник хизмат кўрсатилмаганлиги сабабли шахта кабинаси эшикларининг контактлари бўшаб қолган. Ушбу лифт ҳаракатда вақтида кимдир лифтнинг ташқи эшикларини қўл ёрдамида очишга уринган. Натижада хавфсизлик мосламаси ишга тушган ва лифт ўзини ўзи тўхтатиш вазифасини бажара бошлаган. 

Ўрганиш давомида лифт тушиб кетмагани, аксинча тегишли хавфсизлик қурилмаси ишга тушган ҳолда тўхтагани аниқланди. Ҳозирда тегишли ташкилотлар томонидан лифтдаги камчиликларни бартараф этиш ва воқеа тафсилотларини чуқур ўрганиш ишлари амалга оширилмоқда. Ҳодисадан ҳеч ким жабрланмаган”, — дейилади Қурилиш ва уй-жой коммунал хўжалиги вазирлиги баёнотида. 

“Лифтларда мана шундай ҳолатларнинг олдини олиш мақсадида жорий йилнинг август ойидан бошлаб, Тоғ-кон, геология ва саноат хавфсизлигини назорат қилиш инспекцияси томонидан рўйхатга олинмаган лифт ускуналарини фойдаланишга қабул қилиш тўхтатилган”, — дея қўшимча қилинади вазирлик хабарида.