Қурилиш ва уй-жой коммунал хўжалиги вазирлиги томонидан ОАВ вакиллари ҳамкорлигида рейд тадбирлари ташкил этилди. Бу ҳақда вазирлик матбуот хизмати хабар берди.
Рейд давомида Чилонзор тумани Чўпонота кўчаси 14-уй манзилида Leader House Building МЧЖ томонидан қурилаётган объект ўрганилган. Мавжуд савдо дўкони биносини ертўла қисмида автотураргоҳ ташкил қилиш шарти билан 1-2-қаватлари савдо ва маиший хизмат кўрсатиш мажмуаси бўлган ўрта қаватли турар жой биносига қайта ихтисослаштириб, реконструкция қилиш объектининг қурилиш-монтаж ишлари Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекциясидан тегишли тартибда рўйхатдан ўтмасдан туриб амалга оширилган.
Маъмурий жавобгарлик тўғрисидаги кодекснинг 99-моддаси (шаҳарсозлик тўғрисидаги қонунчиликни бузиш) 7-қисмида назарда тутилган қонун бузилиш ҳолати аниқланганидан келиб чиқиб, ҳудудий назорат қилиш инспекцияси томонидан қурилиш ишларига масъул раҳбар ўринбосарига нисбатан Вазирлар Маҳкамаси қарори билан белгиланган талаб асосида ёзма кўрсатма расмийлаштирилган ҳамда кўрсатма талабларини ўз вақтида бажармагани учун 2022 йил 3 ноябрда маъмурий жазо қўлланилган.
Шунга қарамай Leader House Building МЧЖ томонидан яна қурилиш ишлари олиб борилаётгани аниқланган ҳамда инспекция томонидан 2022 йилнинг 2 февралида 309-сонли ёзма кўрсатма расмийлаштирилган. Кўрсатма талабларини ўз вақтида бажармагани учун 2023 йил 30 мартда МЧЖ раҳбар ўринбосарига нисбатан маъмурий жазо қўлланилган.
Вазирлар Маҳкамаси қарори 1-иловаси “Объектларни қуриш, реконструкция қилиш, мукаммал ва жорий таъмирлаш бўйича шаҳарсозлик ва лойиҳа ҳужжатларининг лойиҳавий ечимларини шаҳарсозлик ҳужжатларига мувофиқлиги юзасидан экспертизадан ўтказиш тартиби тўғрисида”ги низомнинг 5-бандига кўра, шаҳарсозлик ҳужжатлари лойиҳаларининг техник қисми, яъни бино-иншоотнинг зилзилабардошлиги ҳамда энергия самарадорлик кўрсаткичлари, ёнғин хавфсизлиги талаблари юзасидан мажбурий экспертизадан ўтказилиши лозим бўлса-да, City Stroy Project МЧЖ томонидан ишлаб чиқилган ишчи лойиҳа ҳужжатлари экспертиза кўригидан ўтказилмаган.
Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекцияси томонидан қўйилган талабларни бажармасдан ШНҚ ва ҚМҚ талабларини қўпол равишда бузган ҳолда Тошкент шаҳри Чилонзор тумани Чўпонота кўчаси 14-уй манзилида қурилиш-монтаж ишларини давом эттираётган Leader House Building МЧЖ масъул раҳбарларига нисбатан Тошкент туманлараро Иқтисодий судига даъво аризаси киритилган.
Аввалроқ Навоийда фуқаро “дом”га ўзи учун алоҳида лифт ўрнатаётгани аниқланганди. Мулкдорга кўп квартирали уйнинг умумий мулкидан фойдаланиш қоидалари, бунда аҳоли олдига қўйиладиган талаблар тушунтирилган ва ўзбошимчалик билан қурилган қурилмани бартараф этиш бўйича тегишли тартибда мажбурий кўрсатма берилган.
Изоҳ (0)