Биринчи ёки охирги: Кўп қаватли уйларнинг қайси қавати яшаш учун хавфсиз ва қулай?

Қуйида кўп қаватли уйларнинг пастки ва юқори қаватларида яшашнинг ижобий ҳамда салбий томонлари ҳақида батафсил маълумот берамиз.

Пастки қаватда яшашнинг камчиликлари

1. Шовқин

Ўйин майдончаларида юрган болалар, ўтган-кетган ёки тўғридан-тўғри деразалар остида тўхтаб турган машиналар ва тинимсиз таъмирлаш ишлари доимий шовқинни кафолатлайди ва баъзида қўшимча овоз изоляцияси ҳам ундан қутқара олмайди. Баланд товушлар нафақат уйқуни бузади, балки стрессни ҳам келтириб чиқаради, бу эса кейинчалик юрак-қон томир касалликларини ривожланиш хавфини оширади.

 

 

2. Ёқимсиз ҳид

Агар квартира, айтайлик, биринчи қавати жуда паст бўлган Хрушчёв биносида жойлашган бўлса, у ҳолда яқин атрофдаги автомобиллардан чиқинди газлар, кўча чанглари, скамейкалардаги чекувчилар ва кириш жойидаги ахлат қутилари аҳоли учун шовқиндан кам бўлмаган муаммоларни келтириб чиқаради. Швейцариялик олимларнинг фикрига кўра, пастки қаватларда яшовчилар ўпкасида жиддий касалликлар ривожланиш эҳтимоли бошқаларга қараганда 40% юқори.

3. Намлик

Агар қурилиш сифатсиз бўлса, намлик ва зах кўпинча ертўладан квартирага кириб бориши мумкин. Биринчи қаватда яшайдиган кўплаб аҳоли вакиллари жуда тез ўсадиган ва соғлиқ учун зарарли бўлган қора моғор ҳақида шикоят қилади. Изоляция таъмирлаш вақтида ҳимоя чораси сифатида ишлатилади, аммо, афсуски, бу ҳар доим ҳам муаммони ҳал қилмайди. Қолаверса, вақт ўтиши билан уни янгилаш керак, бу эса қимматга тушади.

4. Ёруғлик етишмаслиги

Кўпинча пастки қаватлардаги квартираларнинг деразалари олдида дарахтлар ёки ёруғликни тўсиб қўядиган қўшни бинолар бўлади, шу боис ичкарига ёруғлик етарлича тушмайди. Шунингдек, баъзи хонадон эгалари ўткинчилар деразадан қараб, шахсий ҳаётини бузаётганидан шикоят қилади ва деразага қалин парда осади, аммо бу ҳам уйни табиий ёруғликдан маҳрум қилади. Қуёш нурлари етишмаслиги туфайли руҳий саломатлик бузилади, доимий чарчоқ, хавотир ва уйқусизлик пайдо бўлади.

Юқори қаватларда яшашнинг камчиликлари

1. Болаларнинг ижтимоий интеграциялашуви билан боғлиқ муаммолар

Тадқиқотларга кўра, бешинчи қаватдан пастда яшайдиган болалар юқори қаватлардаги болаларга қараганда анча фаолроқ ва мустақил бўлади. Гап шундаки, квартира қанчалик баланд бўлса, ота-оналар фарзандини кўчага ёлғиз қўйиб юборишдан шунчалик қўрқишади. Оналар учун уни деразадан кузатиб туриш қийин, лифт ҳар доим ҳам хавфсиз эмас. Шунинг учун болалар кўпроқ уйда ўтиришади.

2. Биринчи ёрдам кўрсатиш ва эвакуация қилишдаги қийинчиликлар

Юқори қаватда яшовчилар шифокорнинг юқорига кўтарилишини узоқроқ кутишлари керак бўлади. Ва агар шошилинч касалхонага ётқизиш ҳақида гап кетса, унда жамоа ҳам беморни пиёда туширишга мажбур бўлади. Худди шу нарса фавқулодда эвакуация учун ҳам амал қилади. Биринчи қаватда яшовчилар учун хавф туғилганда, масалан, ёнғин пайтида ташқарига югуриш анча осон. Қолганларга эса кўпроқ вақт кетади.

3. Ёзда жуда иссиқ бўлади

   

Иссиқ ҳавода баланд қаватларда жазирама қуёш хонани пастдан кўра кўпроқ иситади, одатда пастки квартиралар дарахтлар сояси билан ҳимояланган бўлади. Бундан ташқари, энг юқори қаватдаги уйларда деразаларга қуёш уришидан ташқари, бинонинг металл томи ҳам иссиқлик қўшади.

4. Тез кўтарилиш туфайли босимнинг ўзгариши

   

Юқори тезликдаги лифтлар керакли қаватга тезда чиқиш имконини беради. Аммо бундай кўтарилиш кўз олди қоронғилашиши ва қулоқ битишига сабаб бўлади. Лифт ишлаб чиқарувчилари уларни такомиллаштириш устида фаол иш олиб боришларига қарамай, уларни қулай деб атаб бўлмайди. Айниқса, юрак-қон томир касалликлари бўлган кексалар ва ҳомиладорларга ёмон таъсир қилади.

5. Тебранишлар (Вибрация)

   

Осмонўпар биноларнинг юқори қаватларида яшовчилар тебранишлардан пастдагиларга қараганда анча кучлироқ азият чекишади, айниқса гавжум магистрал, темирйўл ёки метро деразалар остидан ўтса. Бу тебранишлар ҳар доим ҳам сезилмайди, лекин улар руҳий тушкунлик, безовталик ва хавотирга олиб келиши мумкин.

Хулоса қилиб айтганда...

Пастки ва юқори қаватлар ўзларининг ижобий-салбий томонларига эга бўлишига қарамай, мутахассислар соғлигингиз учун қаерда яшаш яхшироқ эканлиги ҳақида ҳали ҳам умумий фикрга эга эмас. Шунинг учун “олтин ўрталик” — бешинчидан саккизинчи қаватгача бўлган хонадонни танлаган маъқул.