“Ҳомиладорлар ҳам зинадан чиқиб-тушишга мажбур”. Термизликлар фойдаланишга топширилган 7 қаватли “дом”да лифт йўқлигидан шикоят қилмоқда

Сурхондарё вилоятининг Термиз шаҳрида яшовчи аҳоли вакиллари “Дарё”га мурожаат қилиб, 2021 йил фойдаланишга топширилган уй яшаш учун талабга жавоб бермаслиги, камчиликлари бартараф этилмаганидан шикоят қилди. 

Бизнинг “дом”имизда топширилганидан бери лифти йўқ. Икки йил олдин аҳоли яшай бошлаган “дом”да “свет”га ҳисоблагич қўйилмаган. Ромлари талабга жавоб бермайди. Бу муаммолар ҳақида қурувчиларга айтишдан чарчадик. Кимга мурожаат қилишни билмай, видеомурожаат қила бошладик, — дейди кўп қаватли уйда яшовчи Сабоҳат Абдимуродова. 

Мурожаатчиларнинг билдиришича, одамлар эътирозига сабаб бўлаётган уй Guber Global Constructions  МЧЖ томонидан барпо этилган бўлиб, ташкилот масъули Комил Сайдалиев ҳисобланади. 

Бу уйни Комил ака деган киши қурган. Лекин у одам билан кўришмаганмиз. Телефонда гаплашганмиз. Деярли телефонига жавоб бермайдиган киши. Укаси Фахриддин билан кўришганмиз. Кўп ишни шу Фахриддин ака ҳал қилади. Комил ака эса Тошкентда яшайди, — дейди муаммоларини ҳеч ким эшитмаётганини айтаётган аҳоли вакиллари. 

Шикоятчилар Термиз шаҳрининг об-ҳавоси чангли эканини, ҳар икки кунда бўладиган чангли ҳаво сабаб хонадонлари чангга тўлишини айтмоқда. 

Термиздаги чангли ҳавода уйимиз қумга тўлади. Сабаби қурувчи қўйиб берган дераза ромлари сифатсиз, талабга жавоб бермайди. Ёки бўлмаса қурилиш пайтида дераза ўлчамлари тўғри олинмаган ва шунга яраша ромлар ўрнатилмаган, — дейди аҳоли вакиллари.

Шу уйда яшовчи яна бир фуқаро Муборак Бовулованинг билдиришича, 2021 йил аҳолига топширилган уйнинг камчиликлари кўп бўлган. 

Бизга “дом”ни топширишда уйнинг кадастр ҳужжати қилиниши керак эди, электр токи ва газнинг ҳисоблагичи ўрнатилиши лозим эди. Ичимлик суви ва канализация тармоғи тайёр бўлиши, болалар ўйингоҳи қуриб битказилиши керак бўлган. Аммо буларнинг ҳаммаси қилинмай қолди. Фақат канализация тармоғи бор, холос, — дейди Муборак опа. 

Муборак опанинг айтишича, аҳоли вакиллари бу масала юзасидан вилоят ҳокимлигига ҳам шикоят қилган.

Вилоят ҳокимига ҳам шикоят қилиб бордик. Биз ҳоким қабулига борганимизда вилоят ҳокими чет эл сафарига кетган экан. Ишимиз битмади. Электр тармоқдагилар эса ҳар куни келиб, бизнинг “свет”мизни ўчириб кетишади. Сабабини сўрасак, сизларда электр токи ҳисоблагичи ўрнатилмаган дейишади, — дейди мурожаатчи Марҳабо Назарова. 

Аҳолининг қўшимча қилишича, кўп қаватли уйда электр токи такроран узилавергач, одамлар вилоят прокуратураси ва шаҳар прокуратурасига шикоят қилган. 

Шу уйда яшовчи Гавҳар Каримованинг айтишича, кўп қаватли уйда лифт бўлмагани ҳомиладор аёллар, кекса ёшдаги кишиларнинг уйига кириб-чиқишига қийинчилик туғдирмоқда. 

Мурожаатчилардан яна бири Латофат Жалилованинг билдиришича, қурувчига лифтни қўйиб бериш ҳақидаги барча сўровлар натижасиз қолган, қурувчи ҳар сафар лифтни ўрнатиб берамиз, дейишдан нарига ўтмаган. 

Ҳомиладор аёллар тўққиз ой шу лифтсиз уйга зинадан кириб-чиқиб, фарзандли ҳам бўлди. Лекин ҳамон лифтдан дарак йўқ. Ҳар сафар меҳмон келса, ёки кекса ёшдаги яқинларимиз келса, уйга кириб-чиқишда қийинчиликка учрайди. Бизнинг асосий муаммомиз бўлган лифтни қўйиб беришларини талаб қиламиз. Шунингдек, домофон ҳам ўрнатилмаган. Эшиклар очиқ қолиб кетади. Бўйи етган қизларимиз бор, уйга ҳар ким кириб-чиқишидан қўрқамиз, — дейди Латофат Жалилова. 

Guber Global Constructions  МЧЖда иш бошқарувчи сифатида ишлаб келаётган Фахриддин Сайдалиев “Дарё” журналистининг бу ҳақдаги саволларига жавоб берар экан, 2021 йилда фойдаланишга топширилган янги кўп қаватли уйда айни кунгача 9 та камчилик бўлганини тан олди.

Шу кунгача маблағ билан боғлиқ муаммолар сабаб кўп қаватли уйимизда 9 та камчилик бор эди. Булар болалар ўйингоҳи қурилмагани, лифт ва домофон ўрнатилмагани, совға сифатида берилаётган кондиционерларни ўрнатиш тўлиқ якунланмагани, шунингдек, электр токи ва газга ҳисоблагич ўрнатилмагани эди. Лекин куни кеча раҳбаримиз Комил ака аҳоли билан учрашиб, мулоқот қилди. Муаммолар тез кунда якун топишини маълум қилди, — дейди қурилиш ташкилоти масъули. 

Фахриддин Сайдалиевга кўра, 7 қаватли 54 та хонадондан иборат уй яқинига чиқиндихона қурилган. Одамларга ваъда қилинган кондиционерлар ўрнатиб берилган. 

Ҳар бир уй олган одамга кондиционер совға қилишни ваъда қилгандик. Ваъдага кўра, 54 та хонадоннинг 46 тасига кондиционер ўрнатдик. 8 та хонадонга кондиционер ўрнатиш ишлари қолди. Шунингдек, сув чиқардик. Болалар ўйингоҳини қурдик. Газ ҳисоблагичи барча хонадонларга ўрнатилди. Электр токи бўйича эса 44 та хонадонга ҳисоблагич ўрнатилган. Қолган хонадонларга ҳам аста-секин ўрнатяпмиз, — дейди масъул. 

“Дарё” мазкур ҳолат юзасидан вилоят прокуратураси масъуллари билан боғланиб, аҳоли шикоятига сабаб бўлган ҳолат юзасидан маълумот сўради. Прокуратура ахборот хизмати раҳбари Жуманазар Хурсанов ҳолат бўйича таҳририятга қўшимча ахборот берилишини билдирди.