Остонада Қозоғистон—Ўзбекистон бизнес-форуми бўлиб ўтди (фото)

Қозоғистоннинг Остона шаҳрида 7 август куни Шавкат Мирзиёевнинг давлат ташрифи арафасида икки мамлакат ишбилармон доираларининг 300 дан ортиқ вакиллар иштирокида қўшма бизнес-форум бўлиб ўтди.

Унга Қозоғистон бош вазири ўринбосари Серик Жумангарин ва Ўзбекистон бош вазири ўринбосари Жамшид Хўжаев ҳамраислик қилди. Форумда вазирликлар, идоралар, тармоқ бирлашмалари ва ҳудудий бошқармалар раҳбарлари ҳам иштирок этди.

Тадбирда сўзга чиққан Жамшид Хўжаев тарихан шаклланган яхши қўшничилик, халқлар ўртасидаги дўстлик, ўзаро манфаатли шериклик ва иттифоқчилик руҳини, шунингдек, икки давлат раҳбарлари ўртасидаги ўзаро ҳамжиҳатликнинг юксак даражаси туфайли эришилган ҳамкорликнинг барча йўналишларида салмоқли натижаларга эришаётганини алоҳида таъкидлади.

Хусусан, ўзаро товар айирбошлаш ҳажми 2023 йил якунига кўра 4,4 миллиард доллардан ошгани қайд этилди. Савдо айланмасининг замонавий таркибига транспорт воситалари ва эҳтиёт қисмлар, механик асбоб-ускуналар, озиқ-овқат маҳсулотлари, тўқимачилик маҳсулотлари, қора металлар ва улардан тайёрланган маҳсулотлар, минерал ёқилғи ва электр энергияси, рудалар ва кимё маҳсулотлари киради.

Бунда икки мамлакат иқтисодиётининг улкан салоҳияти товар айирбошлаш ҳажмини сезиларли даражада ошириш имконини беради.

Бу йўналишда савдо тартиб-қоидаларини соддалаштириш, мавжуд тўсиқларни бартараф этиш ва ўзаро савдони қўллаб-қувватлаш, шунингдек, савдо инфратузилмасини яхшилаш ва икки мамлакат ишбилармон доиралари ўртасидаги ўзаро ҳамкорликни ривожлантириш бўйича ҳамкорликдаги ишлар давом эттирилади.

Бу чора-тадбирларнинг барчаси Ўзбекистон ва Қозоғистон ўртасидаги товар айирбошлаш ҳажмини 2030 йилгача 10 миллиард долларга етказиш бўйича ишлаб чиқилган дастурда ўз аксини топган.

Қўшма лойиҳалар портфели автомобилсозлик, электротехника, фармацевтика, кимё саноати, логистика ва девелопмент каби соҳаларни ўз ичига олади. Бироқ бу рўйхат икки мамлакат иқтисодиёти ва саноатининг салоҳиятини тўлиқ очиб бермагани боис олий даражадаги ташриф арафасида умумий қиймати 5 миллиард долларга тенг янги келишувлар пакети шакллантирилди.

Жумладан, Қамбарота ГЭС-1 лойиҳасини амалга оширишда иштирок этиш, учинчи давлатларга экспорт қилишни ташкил этган ҳолда Қозоғистонда лифт, электр энергияси ва газ ҳисоблагичларини ишлаб чиқариш, Қўстанайда Chevrolet автомобиллари учун эҳтиёт қисмлар ва бутловчи қисмларни ишлаб чиқаришни маҳаллийлаштириш, Туркистон вилоятида пахта-тўқимачилик кластерини яратиш, Олмаота ва Атирау вилоятида пойабзал ишлаб чиқариш, Тарозда металлургия заводини қуриш, Жиззахда базалт толаси ишлаб чиқариш, Ўзбекистонда фармацевтика маҳсулотлари ишлаб чиқарувчи корхона қурилиши ва бошқалар.

Турар жой мажмуалари ва инфратузилма объектларини қуриш бўйича лойиҳалар муваффақиятли амалга оширилаётгани алоҳида таъкидланиб, Халқаро саноат кооперацияси марказининг аҳамияти, унинг ҳудудида керамик плиталар, профиллар, металл конструкциялар ва тўқимачилик маҳсулотлари ишлаб чиқарадиган янги корхоналарни жойлаштириш режалаштирилгани қайд этиб ўтилди.

Ҳамкорликни ривожлантиришнинг устувор йўналишлари сифатида логистика занжирларини такомиллаштириш ва товар айирбошлаш ҳажмини оширишга хизмат қиладиган лойиҳалар — қишлоқ хўжалиги маҳсулотларининг ўзаро савдоси ҳажмини ошириш, мева-сабзавот етиштириш ва қайта ишлаш, инфратузилмани яхшилаш, мултимодал йўлакларни ривожлантириш бўйича лойиҳалар кўрсатиб ўтилди.

Икки мамлакат ҳудудлари ўртасидаги ўзаро ҳамкорликни кучайтириш муҳимлиги таъкидланиб, бунинг учун жорий йил охиригача Самарқанд шаҳрида ўзаро ташрифлар жадвалини тайёрлаш ва ҳудудлар форумини ўтказиш таклиф этилди.

Қозоғистон бош вазири ўринбосари Серик Жумангарин янги қўшма ташаббусларни ҳар томонлама қўллаб-қувватлаш, ўзаро манфаатли лойиҳаларни амалга ошириш учун имтиёзли шарт-шароитлар яратиш истагини қайд этиб, қозоқ бизнесини ноёб имкониятлардан унумли фойдаланишга ва ўзбекистонлик ҳамкасблар билан фаолроқ ҳамкорлик қилишга, янги қўшма корхоналар очиш ва ўзаро манфаатли савдо алоқаларини ўрнатишга чақирди.

Форум доирасида B2B ва G2B форматларида музокаралар олиб борилиб, икки мамлакат тадбиркорлари келгусидаги ҳамкорлик истиқболларини атрофлича муҳокама қилишди ва шерикликнинг амалий жиҳатларини муҳокама қилди.

Қўшма бизнес-форум якунида энергетика, геология, автомобилсозлик, электротехника ва енгил саноат, шунингдек, қурилиш материаллари ва фармацевтика маҳсулотлари ишлаб чиқаришда ҳамкорлик салоҳиятини очишга қаратилган инвестиция битимлари ва савдо шартномалари имзоланди.

Қозоғистон—Ўзбекистон бизнес-форумидан лавҳалар

Эслатиб ўтамиз, Шавкат Мирзиёев Қозоғистон президенти Қосим-Жўмарт Тўқаевнинг таклифига биноан 7–9 август кунлари давлат ташрифи билан ушбу мамлакатда бўлади. 

Ташриф дастурига мувофиқ, икки мамлакат раҳбарларининг музокаралари ва президентлар раислигида Олий давлатлараро кенгашнинг биринчи йиғилиши ўтказилиши режалаштирилган. Ўзбекистон билан Қозоғистон ўртасидаги стратегик шериклик ва иттифоқчилик муносабатларини янада чуқурлаштириш масалалари, халқаро ва минтақавий кун тартибининг долзарб жиҳатлари кўриб чиқилади.

Асосий эътибор савдо, саноат кооперацияси, транспорт ва логистика, энергетика, қишлоқ ва сув хўжалиги ҳамда бошқа устувор йўналишлардаги амалий ҳамкорликни кенгайтириш масалаларига қаратилади.

Икки томонлама муносабатларни мустаҳкамлашга қаратилган ҳужжатлар тўпламини қабул қилиш кутилмоқда.