Ўзбекистонда 2023 йил 1 декабргача барча кўп квартирали уйлардаги мавжуд лифтлар хатловдан ўтказилиб, аниқланган камчиликлар бартараф этилиши таъминланади. Бу ҳақда Вазирлар Маҳкамасининг “Саноат электротехника маҳсулотларидан фойдаланишда аҳоли хавфсизлигини таъминлаш ҳамда ушбу маҳсулотлар устидан сифат назоратини кучайтириш юзасидан қўшимча чора-тадбирлар тўғрисида”ги қарори лойиҳасида кўзда тутилган.
Ҳужжатда қайд этилишича, аҳолининг кўп квартирали уйларда яшаши учун қулай ва хавфсиз шарт-шароитлар яратиш, лифтларнинг техник ҳолатини тубдан яхшилаш, авария ҳолатларининг олдини олиш ва аҳолига сифатли хизмат кўрсатилишини таъминлаш мақсадида бир қатор чоралар кўрилади.
Хусусан, республикада ишлаб чиқарилаётган ва импорт қилинаётган лифтларнинг давлат стандартларига ва хавфсизлик талабларига мувофиқлиги ўрганилиб, кўп квартирали уйлар, аҳоли гавжум бўладиган объектларда уларнинг ўрнатилишини назоратга олиш тизими такомиллаштирилади.
2023 йил 1 декабрдан бошлаб кўп квартирали уйлар, шунингдек, лифт ўрнатилиши назарда тутиладиган барча объектлардаги лифтларни фойдаланишга қабул қилишдан олдин уларни мажбурий тартибда диспетчерлик хизматига улаш талаб этилади.
2024 йил 1 январдан бошлаб давлат бюджети маблағлари ҳисобидан молиялаштириладиган қурилиш (реконструкция) объектларини лойиҳалаштиришда устувор равишда республикада ишлаб чиқариладиган лифтлар қўлланилиши талаб этилади.
Тоғ-кон, геология ва саноат хавфсизлигини назорат қилиш инспекцияси ва Техник тартибга солиш агентлиги республикага импорт қилинадиган лифтларнинг техник жиҳатдан тартибга солиш соҳасидаги норматив ҳужжатлар талабларига мувофиқ лабораторияларда синовдан ўтказилиши ва уларга мувофиқлик сертификати расмийлаштирилишини назорат қилади.
Қурилиш ва уй-жой коммунал хўжалиги вазирлиги Қорақалпоғистон Вазирлар Кенгаши, вилоятлар ва Тошкент шаҳар ҳокимликлари билан биргаликда 2024 йил 1 январгача республиканинг барча ҳудудларида кўп квартирали уйларни бошқариш органлари ҳузурида лифтларни мониторинг қилиш бўйича диспетчерлик хизматлари кўрсатилишини ташкил этиб, доимий фаолият юритишини таъминлайди.
Тоғ-кон, геология ва саноат хавфсизлигини назорат қилиш инспекцияси манфаатдор вазирлик ва идоралар билан биргаликда кўп квартирали уйлар, шунингдек, лифт ўрнатилиши назарда тутиладиган барча объектлардаги лифтларни фойдаланишга қабул қилишдан олдин уларни мажбурий тартибда диспетчерлик хизматига улаш бўйича талаблар бажарилиши юзасидан доимий назорат ўрнатади.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Қурилиш ва уй-жой коммунал хўжалиги вазирлиги, Фавқулодда вазиятлар вазирлиги, Тоғ-кон, геология ва саноат хавфсизлигини назорат қилиш инспекцияси билан биргаликда 2023 йил 1 декабргача барча кўп квартирали уйлардаги мавжуд лифтларни хатловдан ўтказиб, аниқланган камчиликлар бартараф этилишини таъминлайди.
Қурилиш ва уй-жой коммунал хўжалиги вазирлиги хатлов якунлари бўйича амалга оширилган ишлар юзасидан 2023 йил 10 декабргача Вазирлар Маҳкамасига умумлаштирилган ҳисобот киритади.
Қурилиш ва уй-жой коммунал хўжалиги вазирлиги, Тоғ-кон, геология ва саноат хавфсизлигини назорат қилиш инспекцияси, Фавқулодда вазиятлар вазирлиги билан биргаликда республикадаги барча тоифадаги лифтларни ҳар йили камида бир маротаба мажбурий техник кўрикдан ўтказади.
Қурилиш ва уй-жой коммунал хўжалиги вазирлиги Рақамли технологиялар вазирлиги билан биргаликда 2024 йил 1 январгача лифт ускуналарининг техник ҳолатини мониторинг қилиш, авария ҳолатларини реал вақт режимида қайд этувчи замонавий электрон дастур ҳамда кўп квартирали уйларда эксплуатация қилинаётган лифтларнинг реестри жорий этилишини таъминлайди.
Тоғ-кон саноати ва геология вазирлиги, Қурилиш ва уй-жой коммунал хўжалиги вазирлиги Қорақалпоғистон Вазирлар Кенгаши, вилоятлар ва Тошкент шаҳар ҳокимликлари билан биргаликда икки ой муддатда лифтлардан фойдаланишда содир бўлган бахтсиз ҳодисалар сабабларини таҳлил қилган ҳолда, келгусида бундай ҳолатларнинг олдини олиш чораларини кўради.
Изоҳ (0)