Майкл Жексоннинг қимматбаҳо либослари, автографлари ва кристаллар билан безатилган лимузини ҳозирда кимларга тегишли?

29 август куни поп маданиятининг энг кўзга кўринган намояндаларидан бири Майкл Жексон 66 ёшга тўлган бўларди. 15 дан ортиқ “Гремми”, юзлаб бошқа мукофотлар ва афсонавий “ой юриши” билан машҳур бўлган америкалик хонанда ўзи хоҳлаган ҳамма нарсага эга эди. Қуйида унинг қимматбаҳо ва машҳур буюмлари, автографлари ва бошқа атрибутларига нима бўлгани ҳақида гаплашамиз.

Лади Гаганинг коллекцияси

Яна бир эстрада юлдузи — Леди Гага Майкл Жексоннинг либосларини коллекция қилади. У кумирининг кийимларини музей экспонатлари каби ҳароратни назорат қилувчи махсус хонада сақлайди. Хонанданинг биринчи харидларидан бири 2012 йилда Жексоннинг 55 та маҳсулотидан иборат коллекцияси эди. Шундай қилиб, биринчи Bad world турнесидаги кўйлаги ва юз минглаб долларлик Swarovski кристаллари билан безатилган оқ қўлқопи Гагага тегишли. Бир неча йил олдин унинг шахсий коллекциясида хонанданинг 400 га яқин буюмлари мавжудлигини айтганди. Ўшанда Гага унинг шарафига музей очишни режалаштираётгани ҳақида хабарлар тарқалган эди.

“Thriller” клипидаги куртка

2011 йилда “Thriller” клипида кийилган қизил-қора куртка аукционга қўйилади. Айнан 1983 йилда Майкл Жексоннинг мазкур клипи ўша пайтда мусиқа тарихидаги энг қиммат — ярим миллион долларлик клипга айланади. Машҳур куртка Голливуднинг машҳур дизайнери Дебора Надулман-Ландис томонидан яратилган. Техаслик биржа трейдери Milton Verret кимошди савдосида 1,8 миллион долларлик якуний таклифни бериб, машҳур курткани сотиб олади.

Эсдалик учун дастхатлар

Майкл Жексон каби юлдузларнинг автографлари, айниқса, уларнинг ўлимидан сўнг олтинга тенг баҳоланади. Рақамлар билан айтганда – минг доллардан бир неча ўнлаб ва ҳатто юз минглаб долларгача. Мухлислар ва коллексионерлар бутун дунё бўйлаб автографлар учун ов қилишади. Ҳамма ҳам эсдалик совғаларини олишнинг уддасидан чиқавермайди — дастхатлар, фотосуратлар ва бошқалар. Россиялик юлдузлар орасида Майкл Жексон автографининг бахтли эгаси қўшиқчи Люси Чеботина бўлиб, у яқинда ўз қувончини томошабинлар билан баҳам кўрди.

Чинни ҳайкал

Майкл Жексон билан боғлиқ энг қиммат буюмлардан бири таниқли рассом Жефф Кунснинг 2001 йилда 7,5 миллион долларга баҳоланган ҳайкали ҳисобланади. Олтин билан қопланган чинни ҳайкалчада қўшиқчи билан унинг севимли жонивори — Бабблз лақабли шимпанзе ҳам тасвирланган. Поп қиролидан илҳомланган Кунс биринчи марта 1988 йилда кўргазмаси учун бадиий объект яратади. Ўшанда Жексоннинг баъзи мухлислари қўшиқчининг ташқи қиёфаси унчалик ўхшамагани ҳақида салбий фикрлар билдиришган. Бироқ рассомнинг ўзи бу асарни жуда яхши кўради. 

“Агар мен кимдир бўлишим мумкин бўлса, у Майкл Жексон бўларди”, деган Кунс бир неча бор.

Кардашян оиласи учун совғалар

Майкл Жексон коллекциялари ҳамма нарсага эга бўлганлар учун совға вариантидир. 2019 йилда Ким Кардашян Рождествода қизига Жексон Элизабет Тейлорнинг 65 ёши нишонланган базмда кийган бахмал кўйлагини совға қилади. Иккинчи совға “Smooth Criminal” клипида кийган шляпа бўлади. Кардашян ижтимоий тармоқларда таъкидлаганидек, шляпада поп-қиролнинг косметика излари ҳам сақланиб қолган.

Эксклюзив транспорт

Майкл Жексон ғайриоддий машиналарни яхши кўриши билан машҳур эди. Унинг улкан коллекциясида карета ҳам, Rolls Royce лимузини ҳам бўлган. Лимузиннинг интерери хонанданинг ўзи томонидан ишлаб чиқилган. Кристаллар билан безатилган ва 24 каратли олтин билан қопланган салон қимматбаҳолиги билан ҳаммани лол қолдирган ва том маънода қироллар саройини эслатган.

“Ой юриши” пайпоқлари

Бугунги кунда машҳур “ой юриши”дан роппа-роса 40 йил ўтди. 1983 йилда Майкл Жексон “Billie Jean” қўшиғи учун катта кристаллар билан безатилган оқ пайпоқда саҳнага чиқади. Бир неча йил олдин қўшиқчининг кўплаб буюмлари сотилган кимошди савдосида бир жуфт пайпоқ 2 миллион долларга баҳоланган эди.