Кинодаги таомлар шунчаки реквизит эмас. Улар қаҳрамонларни, яширин маъноларни ва ҳатто бутун воқеани тушуниш калитидир. Овқатлар бир қарашда кўринганидан кўра чуқурроқ маънога эга. Қуйидаги мақолани ўқигач, кинога бутунлай бошқача назар билан қарайсиз.
“Шоколад”
Шоколад эркинлик ва ҳузур-ҳаловат тимсоли сифатида бутун фильмнинг асосий ғоясини акс эттиради. У нафақат ширин егулик, балки шаҳар аҳолисининг қўрқув ва истакларини акс эттирувчи рамздир. Шоколад анъаналардан ташқарига чиқиш ва дунёқарашни кенгайтиришни англатади. Вианн дўконининг очилиши шаҳарнинг қаттиқ ахлоқий меъёрларига киритилган илк ёриқдир. Фильм шаҳар ҳаётига кириб келаётган янги турмуш тарзининг турли қирраларини кўрсатиш учун шоколад тарихи ва таъмини моҳирона қўллайди. У хилма-хиллик, аёллар ҳуқуқи, мустақиллик, романтика ва ўзликни англашни намоён этади.
“Рататуй”
Каламуш Реми танқидчи Эго учун айнан рататуй тайёрлагани бежиз эмас, чунки бу таом ошпазнинг ҳар ким овқат пишира олишига бўлган ишончини кўрсатади. Ахир бу оддий қишлоқ таоми манмансираб юрган танқидчини болалигига қайтаради. Рататуй унга оиласини эслатади. Шунингдек, ҳар қандай нарсадан ҳам санъат асари яратиш мумкинлигини исботлайди. Айтганча, таом номи ҳам сўз ўйини ҳисобланади. Чунки унда инглизча “каламуш” маъносини англатувчи “рат” сўзи мавжуд.
“Кун-фу панда”
Понинг отаси ўз ҳунарини жон-дилдан севади ва шаҳарда энг лаззатли угра тайёрлайди. Унинг овқатга бўлган иштиёқи Понинг буюк жангчи бўлиш орзусини акс эттиради. Гарчи отаси ҳар доим ҳам Пони тушунмаса-да, уни қўллаб-қувватлайди ва шу билан бирга панданинг жисмоний саломатлигига ғамхўрлик қилади. Бу мультфильмдаги угра шунчаки таом эмас. У қаҳрамоннинг оилавий илдизлари ва ватанига садоқати рамзи.
“Руҳлар олами”
Овқат бу ерда нафақат исрофгарлик рамзи, балки ота-оналар (катта авлод) ва фарзандни (ёш авлод) ажратиб турадиган мезон сифатида намоён бўлади. Шунингдек, таом ҳаммомга келувчи руҳларга аталган инъом ҳисобланади. Бироқ худоларни унутган одамлар тайёрланган таомларни ўзлари еб қўяди. Бу нафақат очкўзлик, балки замонавий жамиятда эътибордан четда қолган қадимий маданиятга ҳурматсизликдир.
“Матрица”
Жамоага ким хоинлик қилгани фош этилган саҳнада, Сайфернинг стейкни қандай иштаҳа билан еяётганини кўриш мумкин. Чунки у ўзи учун бахтни барча саволларга жавоб топишда эмас, балки ҳаётнинг оддий қувончларида эканлигини англаган: лаззатли таомлар, гўзал манзаралар, ҳашаматли ҳаёт. Буларнинг барчасини у матрицадан чиқиб кетгач йўқотган эди. Унинг учун билмаслик - бу роҳат. Шунинг учун ҳам у дўстларига хиёнат қилади.
“Меню”
Фильм воқеалари хусусий оролда жойлашган ва жиддий ошпаз Жулиан бошқарадиган супер элита ресторанда кечади. Бироқ энг эътиборга лойиқ таом фильм охиридаги чизбургердир. Чунки қаҳрамон ошпазнинг хонасини тезгина кўздан кечириб, бу шафқатсиз одамга аслида нимани пишириш ёққанини кўрсатувчи далилларни топади.
“Рататуй” мультфильмидаги Эго сингари бу оддий таом ошпазни карьерасининг бошланишига, ҳаёт оддий қувончларга тўла бўлган даврларга қайтаради. Ўшанда овқат тайёрлашда нафислик ва ҳайратга солишнинг ҳожати йўқ эди. Эрка бойларнинг кўнглини овлаш шарт эмасди. Оддий бутерброд кўплаб оддий одамларни тўйдириши ва уларга озгина бахтли тўқлик келтириши мумкин бўлган пайтлар эди.
“Ошпаз йўлга чиқди”
Бош ошпаз Карл Каспер севгилиси Молли учун бир ликоп спагетти тайёрди. Бу ҳолат Молли ошпазнинг тайёргарлик жараёнини кузатаётганда ёқимли ўйноқилик туйғусини уйғотади. Камера бош ошпазга эмас, балки пастага қаратилади. Хира ёритилган квартирада тасвирга олинган бу саҳна таом атрофида ҳис-туйғулар уйғотади ва ажойиб паста таомидан олинган лаззатни акс эттиради. Фильмнинг қолган қисми ошпазлик ва унинг оила, жамият ҳамда маданият билан алоқасини ўрганар экан, спагетти саҳнаси овқат ва муҳаббатнинг бир-бирига қандай чамбарчас боғланганлигини акс эттиради.
Изоҳ (0)