АҚШ Давлат департаменти 6 мингдан ортиқ халқаро талаба визасини бекор қилди. Бу қонун бузилишлари ва муддат тугаганидан кейин ҳам мамлакатда қолиш ҳолатлари кўпайгани билан изоҳланмоқда. Бу ҳақда BBC хабар берди.
Департамент маълумотларига кўра, визаларнинг катта қисми қонунбузарликлар — тажовуз, маст ҳолда машина ҳайдаш, ўғирлик ҳамда терроризмга ёрдам каби сабаблар билан бекор қилинган.
Қарор АҚШ президенти Дональд Трамп маъмурияти иммиграция ва халқаро талабалар бўйича назоратни кучайтираётган бир пайтда эълон қилинмоқда. Расмийлар терроризмга ёрдам деганда нимани назарда тутаётганини аниқ очиқламаган, бироқ ҳукумат Фаластинни қўллаб-қувватлаб намойиш уюштирган айрим талабаларни ҳам нишонга олгани, уларнинг хатти-ҳаракатларини антисемитизм сифатида баҳолагани айтилмоқда.
6 мингдан ортиқ бекор қилинган визаларнинг қарийб 4 мингтаси қонунбузарликлар билан боғлиқ. Яна 200–300 та виза эса “INA 3Б” моддаси остида (инсон ҳаётига хавф туғдирувчи ёки АҚШ қонунларини бузувчи террористик фаолиятда иштирок этганлик) бекор қилинган.
Трамп маъмурияти олдинроқ дунё бўйлаб АҚШ элчихоналарида халқаро талабалар учун виза учрашувларини вақтинча тўхтатган эди. Июнь ойида жараён қайта бошлангач, аризачилар ўзларининг ижтимоий тармоқлардаги аккаунтларини оммага очиб қўйишлари талаб қилинган. Расмийлар бу орқали АҚШ фуқаролари, маданияти, ҳукумати ва тамойилларига қарши ҳар қандай душманлик белгиларини аниқлашни мақсад қилган. Давлат департаменти ходимларига, шунингдек, хорижий террорчи гуруҳларни қўллаб-қувватлайдиган ёки АҚШ миллий хавфсизлигига таҳдид солувчи шахсларни аниқлаш бўйича кўрсатмалар берилган.
Давлат котиби Марко Рубио май ойида минглаб талаба визалари қайтариб олинганини маълум қилганди Унга кўра, бу жараён яна давом этади. Демократлар эса Трамп маъмуриятининг бу чораларини танқид қилиб, уларни талабаларнинг ҳуқуқларини поймол қилиш деб баҳоламоқда.
Опен Doors ташкилоти маълумотларига кўра, 2023/2024-ўқув йилида АҚШдаги олий таълим муассасаларида 210 дан ортиқ давлатдан 1,1 миллиондан кўпроқ халқаро талаба таълим олган. Бу умумий талабалик контингентининг тахминан 6 фоизини ташкил этади.
Изоҳ (0)