Америкалик хонанда Тейлор Свифт Forbes’нинг дунёдаги энг бадавлат аёл қўшиқчилар рейтингида биринчи ўринни эгаллади, деб ёзмоқда “Unian.net” нашри.
Свифтнинг бойлиги 1,6 миллиард долларга баҳоланмоқда. Ушбу суммадан тахминан 600 миллиони концертлар ва гонорарлардан келган, худди шунча миқдор мусиқий альбомлардан тушган даромадларга тўғри келади.
125 миллион доллар маблағ қўшиқчининг кўчмас мулкларга киритган сармоясига тегишли. Шунингдек, юлдузнинг капитали дунё бўйлаб гастрол сафарлари, стриминг платформаларидан тушган рекорд даражадаги даромадлари ҳамда сотилган дискларидан келган фойда орқали кўтарилиб бормоқда.
34 ёшли Тейлор Свифт 1,4 миллиард доллар бойликка эга бўлган яна бир машҳур хонанда — Рианнани ортда қолдирди. Forbes нашри қайд этишича, Тейлор Свифт жорий йилнинг апрель ойида бутунжаҳон миллиардерлар сафига киритилди. У ўтган йилда бешта қитъа бўйлаб Тhе Eras Tour гастрол сафарларида бўлди ва миллиардерлар рейтингига фақатгина қўшиқлари ва концерт дастурлари асосида кирган биринчи хонандага айланди.
Тейлор Свифтнинг мукофотлари
Свифт даромади 2,5 миллиард долларга етган дунёдаги барча мусиқачилар орасида иккинчи ўринда. У 14 карра “Гремми” мукофоти совриндори бўлиб, улардан тўрттаси “Йилнинг энг яхши альбоми” номинацияси учун берилган. Rolling Stone ва Billboard маълумотларига кўра, Тейлор Свифтнинг қўшиқлари барча даврларнинг энг яхши қўшиқлари ва альбомлари рўйхатига киритилган.
Изоҳ (0)