Хонанда, раққоса ва қўшиқлар муаллифи Бритни Спирс ўзининг ижтимоий тармоқдаги саҳифасида Америка Қўшма Штатларини тарк этиб, Мексикага кўчиб ўтганини маълум қилди. Унинг сўзларига кўра, қўшиқчи папарацциларнинг доимий эътибори ва таъқибидан жуда чарчаган. Шу сабабли бошқа давлатга кўчиб кетишга мажбур бўлган.
Спирс АҚШнинг кўплаб таблоидларда чоп этилаётган фотосуратлари ҳақиқатдан анча йироқлигини ҳамда сариқ матбуотлар унинг қиёфасини атайин нохуш кўринишда тасвирлаётганидан ранжиган.
“Бундай суратлар менинг обрўйим ва образимга путур етказмоқда, қолаверса, юрагимга қаттиқ ботмоқда. Улар менинг юзимни даҳшатли кўринишда чоп этишади, бу суратларда мен ҳатто ўзимга ҳам ўхшамайман”, дейди 2000 йилларнинг поп юлдузи.
Бритнининг айтишича, бундай хунук ҳолатга чидаш хонанда учун оғир бўлган ва охир-оқибат унинг сабр косаси тўлган:
“Ҳа, мен мукаммал кўринишдаги аёл эмасман, лекин атрофимизда жуда кўп шафқатсиз инсонлар учраб туради” дейди Спирс.
Хонанда яқинда собиқ турмуш ўртоғи, фитнес тренер Сем Асгари билан ажрашди. Никоҳни расман бекор қилиш жараёни Бритни Спирснинг туғилган кунида — 2 декабрда бўлиб ўтди.
Маълумот учун, “Baby One More Time”, “Toxic”, “Everytime”, “Stronger” ва кўплаб ҳит қўшиқлар муаллифи Бритни Спирс фаолияти давомида 36 та мукофот ва 87 та номинацияга эга бўлган. Қўшиқчи Forbes журнали маълумотларига кўра дунёнинг 100 та энг нуфузли ва машҳур инсонлари рўйхатида 6-ўринни эгаллаган, 2010 йилда ўн йилликнинг энг кўп альбоми сотилган хонанда ва дунёдаги учинчи энг нуфузли мусиқачисига айланган. Фаолияти давомида 9 та студия альбомини чиқариб, 30 миллиондан ортиқ пластинкасини сотишга муваффақ бўлган. У “Гремми”, АМА, Billboard Music Awards, МTV Video Music Awards ва Nick Teen Choice Awards каби мукофотларини қўлга киритган.
Изоҳ (0)