Ўзбекистонда 2025 йил 1 сентябрдан бошлаб давлат меҳнат инспекторлари томонидан ўтказиладиган текширувлар ҳақида ваколатли органни олдиндан хабардор қилиш тартиби бекор қилинади.
Президентнинг “Меҳнат муносабатлари ва касбга тайёрлаш тизимини такомиллаштириш ҳамда иш берувчиларни рағбатлантиришга оид қўшимча чора-тадбирлар тўғрисида”ги фармонига кўра, 2025 йил декабргача давлат меҳнат инспекторлари томонидан текширувлар ўтказиш тартибини тасдиқлаш тўғрисидаги ҳукумат қарори лойиҳаси тайёрланиб, Вазирлар Маҳкамасига киритилади.
Бунда қуйидагилар назарда тутилиши лозим:
- тадбиркорлик субъекти номи аниқ бўлмаган ҳолатларда текширув тайинлаш тўғрисидаги буйруқда ҳуқуқбузарлик содир этилган объектни (манзилни) кўрсатган ҳолда текширув ўтказиш;
- давлат меҳнат инспекторларининг қонун бузилишини бартараф этиш тўғрисидаги ёзма кўрсатмаларини белгиланган муддатларда бажармаган иш берувчиларда текширув ўтказиш;
- иш берувчини текширув тайинланганлиги тўғрисидаги буйруқдан унинг ЯММТдаги шахсий кабинети орқали хабардор қилиш;
- текширув давомида фаолияти легаллаштирилган ишчиларга иш ҳақи ҳисобланмаслиги қайта текширув ўтказишга асос бўлиши.
Фармонда белгиланишича, 2025 йил 1 сентябрдан “Хавфни таҳлил этиш” тизимининг таҳлил натижаларига асосан ўтказиладиган текширувларнинг бошланиши ҳақида камида 10 иш куни олдин тадбиркорлик субъектини хабардор қилиш тартиби давлат меҳнат инспекторлари томонидан ўтказиладиган текширувларга татбиқ этилмайди.
Шу санадан бошлаб Ўзбекистонда корхоналар ўзида мавжуд вакансиялар ҳақида бандлик органларига маълумот бериш мажбуриятидан озод этилади. Шу билан бирга, иш берувчилардан бандлик органлари йўлланмаси асосида юборилган номзодларни ишга қабул қилмаганлик учун сабаб келтириш талаби бекор қилинади. Бу ҳолатда иш берувчи маъмурий жавобгарликка тортилишига чек қўйилади. Норасмий бандликка йўл қўйган иш берувчиларга нисбатан жавобгарлик кучайтирилади.
Изоҳ (0)