Америкалик қўшиқчи Мерайя Керининг онаси Патрисия ва опаси Элисон ўтган дам олиш кунида бир кунда вафот этди. Бу ҳақда қўшиқчи People журналига маълум қилди.
Аll I Wаnt for Christmas Is You хит қўшиғи ижрочиси ва “Гремми” мукофоти совриндори ҳозирда “юраги оғриган”, аммо ўлимидан бир ҳафта олдин онаси билан бирга бўлолганидан “бахтли” эканлигини айтди. Мерайя Кери, шунингдек, мухлислари ва барча обуначиларига қўллаб-қувватлаганлари учун миннатдорлик билдирди.
Хонанданинг онаси Патрисия 87 ёшида, опаси Элисон 63 ёшда дунёдан кўз юмди. Хонанданинг маълум қилишича, уларнинг ўлими сабаблари аниқ эмас.
Патрисия Кери опера қўшиқчиси ва вокал ўқитувчиси эди. BBC таъкидлаганидек, Мерайя мемуарида онаси ва опаси билан бўлган мураккаб муносабатлари ҳақида айтиб ўтган. Китоб 2020 йилда нашр этилган. Нашр қилинганидан кейин Элисон Кери синглисини туҳмат қилганликда айблаб, китобнинг чиқарилиши унинг учун “катта руҳий зарба” бўлганини айтиб, судга мурожаат қилади.
Шунга қарамай, Кери мемуарида онасига бўлган меҳри, у билан яхши муносабатда бўлгани ҳақида ҳам ёзган . 2010 йилда онаси билан ҳамкорликда қўшиқчи O Come All Ye Faithful / Hallelujah Chorus дуэтини ёзган.
Изоҳ (0)