Андижон туман ҳокими Бобуржон Юлдашев 20 ёшдан 45 ёшгача бўлган оналар ўртасида китобхонлик мусобақасини ўтказиш ташаббуси билан чиқди. Бу ҳақда туман ҳокимлиги ахборот хизмати хабар берди.
Таъкидланишича, танлов якунлари бўйича 1-ўринни эгаллаганларга 6 ойлик электр, газ, ичимлик суви ва бошқа турдаги коммунал тўловлар тўлаб берилади. Иккинчи ва учинчи ўринларни қўлга киритганлар 4 ва 2 ойлик коммунал тўловли ваучерлар соҳибига айланиши мумкин.
“Дарё” мухбири боғланган Андижон тумани ҳокими Бобирбек Юлдашев билан боғланди. Ҳокимнинг таъкидлашича, танлов орқали уйда ўтирадиган хотин-қизларни китобхонликка жалб қилиш режалаштирилган.
Бугун айрим ёш оналар фарзандлари савол берса ҳам билмасдан телефон титкилаб, интернетдан айтиб беряпти. Кўп нарсани билмайди, китоб ўқимаяпти.
Энг катта мақсадим уйда ўтирган аёллар ўртасида китобхонликни ривожлантириш ва шу орқали келажак авлодни етук қилиб тарбиялашда оз бўлса-да ҳиссамни қўшиш.
Мен ўйлайманки, шу танлов баҳонасида энг ками беш юз, олти юзтага яқин оналаримиз қўлига китоб олади. Китобларни ўқиш орқали дунёқараши янада кенгаяди. Асосийси оилада китобхонлик муҳити яратилади, дейди туман ҳокими.
Ҳокимнинг айтишича, танлов маҳаллий бюджетдан орттирилган ва ҳомийлик маблағлари ҳисобига ўтказилади.
Кимдир касал бўлса, яна кимдир қандайдир шахсий муаммолари ёки ўқишига пул тўлолмасдан бизга келиб мурожаат қилади. Уларга пул ажратяпмиз, ёрдам қиляпмиз. Керак бўлса, маҳаллий бюджетдан айрим нарсалар учун маблағ сарфлаяпмиз. Қисқаси, шуларга пул топяпмиз. Лекин, китобхонликни ривожлантириш учун етарли даражада эътибор қаратмасканмиз.
Ўзингиз биласиз, бизда аксар аёлларимиз, яъни келинларимиз уйда ўтиради. Қайнота-қайнонасининг хизматини қилади, фарзандларининг тарбияси билан машғул. Бундан бўш қолса интернет ковлайди ёки телевизорда сериал кўради.
Шуларни ўйлаб, бу танловни ташкил этишни мақсад қилдим, дейди ҳоким Бобирбек Юлдашев.
Нега мукофотга айнан коммунал тўловлар?
Ғолибларга коммунал тўловларни тўлаб бериш орқали китобхонликни ривожлантирса бўларканми, деган саволни ўртага ташлашингиз мумкин. Биз ҳам роса ўйландик. Кейин бугун оилалардаги энг катта муаммоли масалалардан бири бу коммунал тўловларни тўлаш зарурати эканлигини ҳисобга олиб, мана шу вариантни танладик.
Ҳар бир аёл кунига ўн-ўн беш бетдан китоб ўқиса ҳам уч ойда бешта китобни бемалол тугата олади. Уйда ўтириб, китоб ўқиш орқали озгина бўлса ҳам оилавий бюджетга фойда келтирган келин қайси қайнонага ёқмайди. Албатта, ёқади. Асосийси, ниятимиз яхши. Шу орқали хайрли ишга қўл урдик, дейди Бобирбек Юлдашев.
Маълум қилинишича, танлов йил давомида тўрт маротаба, яъни ҳар чоракда бир ўтказилади. Биринчи танлов жорий йилнинг 1 февралидан 25 мартга қадар бўлиб ўтади. Иштирокчиларга ўқиш учун бештадан китоб берилади.
Танлов уч босқичда ташкил этилади. Биринчи босқич маҳаллалар кесимида тест тартибида ўтади. Унда ҳар бир маҳалладан элликтадан хотин-қизлар қатнашиши кўзда тутилмоқда. Ҳар бир маҳалладан ғолиб аниқланиб, сектор босқичига йўлланма олади. Якуний туман босқичида секторлар кесимида ғолиб бўлганлар беллашади. Энг кучли деб топилган 9 нафар иштирокчига эгаллаган ўрнига қараб, коммунал тўловлари тўлаб берилади.
Изоҳ (0)