Ҳокимлик даврида қабулига келганларга пойгакдан жой бериши билан интернетда машҳур бўлган Андижон тумани собиқ ҳокими Абдужаббор Эгамбердиев янги лавозимга тайинланди. Бу ҳақда “Дарё” манбалари хабар бермоқда.
Таъкидланишича, Абдужаббор Эгамбердиев 2024 йилнинг 18 декабрь куни Ўзбекистон касаба уюшмалари федерациясининг Андижон вилояти кенгашининг йил якунларига бағишланган йиғилишида Кенгаш раиси лавозимига тайинланган. У бунга қадар Агросаноат мажмуи ходимлари касаба уюшмаси Республика кенгашининг вилоят бўйича масъул ташкилотчиси вазифасида ишлаб келаётган бўлган.
Маълумот учун, Абдужаббор Эгамбердиев узоқ йиллар Бўз тумани, Улуғнор тумани, Қўрғонтепа тумани ва Андижон шаҳар солиқ инспекцияси бошлиғи, шунингдек, 2013 йилдан 2023 йилга қадар Андижон вилояти ҳокимининг ижтимоий-иқтисодий ривожлантириш, хизмат кўрсатиш ва тадбиркорлик масалалари бўйича биринчи ўринбосари лавозимларида ишлаб келган. У 2021 йилнинг февралидан 2022 йилнинг сентябрь ойига қадар Андижон туманига ҳокимлик қилган.
У Президент топшириғига биноан 2022 йилнинг 27 сентябрь куни давлат хизматчиси этикасига номуносиб хатти-ҳаракатлари, раҳбарлик маданиятини сақламагани, ўтказилган қабулларда фуқароларга ҳурматсизликка йўл қўйгани ва фаолиятидаги бошқа камчиликлари учун Андижон тумани ҳокими лавозимидан озод этилганди.
2022 йилнинг август ойида Андижон тумани ҳокими Абдужаббор Эгамбердиевнинг ҳокимлик биноси ҳовлисида фуқаролар учун бўлиб ўтган сайёр қабули кенг муҳокамаларга сабаб бўлганди. Унда ҳоким айвон ичида ўтириб, фуқароларни эса айвондан ташқарига ўтказиб мулоқот қилган. Буни ҳокимлик ижтимоий масофа сақлаш учун қилинган, деб изоҳлаганди.
Ўтган йилнинг январь ойида ижтимоий тармоқларда Андижон туманининг собиқ ҳокими Абдужаббор Эгамбердиев қамоқдан озод қилингани ҳақида хабарлар тарқалганди.
Изоҳ (0)