Andijon viloyatining Marhamat tumani hokimi 15 yoshdan 30 yoshgacha bo‘lgan yoshlar o‘rtasida “Zukko kitobxon” tanlovini o‘tkazdi. Tanlovi g‘olibi ota-onasi bilan birgalikda Dubayga sayohatga yuboriladi. Bu haqda “Daryo”ga tuman hokimligi axborot xizmati xabar berdi.
Ma’lum qilinishicha, ushbu tanlov tumani hokimi Bobur Yo‘ldoshev tashabbusi bilan yoshlarning kitob o‘qishga qiziqishini oshirish, kitobxonlik va mutolaa madaniyatini yuksaltirish, ularning intellektual salohiyatini yuksaltirish maqsadida o‘tkazilgan.
Tanlov ikki bosqichda tashkil etilgan bo‘lib, unda O‘zbekistonning turli viloyatlaridan kelgan 500 nafarga yaqin yoshlar o‘z bilimlarini sinovdan o‘tkazgan. Ishtirokchilar “O‘zbek adabiyoti bilimdoni”, “Jahon adabiyoti bilimdoni” hamda “Zukko kitobxon” shartlari bo‘yicha savol-javoblar asosida g‘oliblik uchun bellashgan.
Tanlov yakuniga ko‘ra, Marhamat tumanidagi 7-umumta’lim maktabining 10-sinf o‘quvchisi Soliha G‘ulomjonova birinchi o‘rinni egallab, ota-onasi bilan birga Dubayga sayohat qilish uchun yo‘llanmani qo‘lga kiritgan. Ikkinchi o‘rin hamda uch kishilik Toshkent, Samarqand, Buxoro va Xiva shaharlariga sayohat yo‘llanmasi paxtaobodlik Andijon davlat universiteti tadqiqotchisi Ma’mura Madaminovaga nasib qilgan. Uchinchi o‘rin sohibi bo‘stonlik Marjona Akramjonovaga esa maishiy texnika buyumlari topshirilgan.
Avvalroq Shavkat Mirziyoyev “Zakovat intellektual o‘yinini aholi o‘rtasida ommaviy-ma’rifiy harakatga aylantirish va boshqa intellektual o‘yinlarni rivojlantirishga oid chora-tadbirlar to‘g‘risida”gi qarorni imzolagani to‘g‘risida xabar berilgandi. Unga ko‘ra, 2022/2023-o‘quv yilidan boshlab intellektual o‘yinlarning respublika bosqichida g‘olib bo‘lgan o‘quvchi yoshlar va talabalar uchun yil davomida har oyda beriladigan “Zakovat” stipendiyasi joriy etiladi.
Izoh (0)