Андижон вилояти, Марҳамат тумани, “Алитепа” МФЙ ҳудудидан ўтувчи Д-140 автомобиль йўлининг 40-километрида 8 январь куни соат 21:35 ларда ЙТҲ содир бўлди. Бу ҳақда вилоят ИИБ ЖХХ ЙҲХБ ахборот хизмати хабар берди.
Маълум қилинишича, ҳайдовчи 1998 йилда туғилган Б.К. Spark автомобилида катта тезликда ҳаракатланган ва рул бошқарувини йўқотиб, йўл четидаги дарахтга тўқнашган.
Ҳодиса оқибатида вафот етган ва тан-жароҳат олганлар бор.
Ҳолат юзасидан Марҳамат туман ИИБ ходимлари томонидан тергов ҳаракатлари олиб борилмоқда.
Аввалроқ Андижон вилоятида 2024 йилнинг 11 ойи мобайнида 630 та йўл-транспорт ҳодисаси содир этилган бўлиб, оқибатда 137 нафар фуқаро вафот этгани ҳақида хабар берилганди.
Йўлларда болалар ўлими
Декабрь ойида Хўжаобод туманида Lacetti автомобилини бошқариб кетаётган ҳайдовчи қатнов қисмининг белгиланган жойидан кесиб ўтаётган 12 ёшли болани уриб юборди. Июль ойида эса Андижон шаҳрида Cobalt ҳайдовчиси 10 ёшли қизчани уриб юбориб, жароҳатланишига сабаб бўлганди.
Шунингдек, ноябрь ойида Жиззах вилоятининг Бахмал туманида Cobalt катта тезликда вояга етмаган икки қизни уриб юборди. Шунингдек, Самарқандда автобус мактаб яқинида йўлни кесиб ўтаётган болани уриб юбориб, унинг ўлимига сабаб бўлганди. Сурхондарёда 1-синф ўқувчиси Nexia уриб юборишидан вафот этганди.
Сентябрда Тошкентда BYD 9 ёшли мактаб ўқувчисини уриб юбориб, унинг ўлимига сабабчи бўлганди. Худди шу каби ҳолат июль ойида Навоий вилояти Хатирчи туманида содир бўлган. Катта тезликда ҳаракатланаётган BYD пиёдалар ўтиш жойидан ўтаётган 9 ёшли қизалоқни босиб кетган. Ўша ойда Самарқандда 7 яшар бола автомобиль уриб кетиши оқибатида вафот этди. Апрелда Жиззахда содир бўлган ЙТҲ оқибатида икки нафар мактаб ўқувчиси ҳалок бўлди.
Болалар иштирокида аянчли ЙТҲлар кўпайгач, жамоат фаоллари йўлларда болалар ўлими учун сиёсий жавобгарлик бўлиши кераклигини айтди.
Изоҳ (0)