Андижон вилоятининг Булоқбоши ва Фарғона вилоятининг Бағдод туманларида валюта қимматликлари савдоси билан шуғулланиб келган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Булоқбоши туманида фуқаро Н.О. фуқаро С.Қ.дан 4 минг долларни 51,7 млн сўмга сотиб олган вақтида ушланган. Унинг ёнидан 586 доллар, 14 750 рубль, 4 770 қирғиз соми ва 74,8 млн сўм пуллар ашёвий далил сифатида олинган.
Шунингдек, Бағдод туманида фуқаро С.А. фуқаро М.Х.га 4 минг долларни 52 млн сўмга сотган вақтида ушланган.
Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.
Қўлга олинаётган “валютчик”лар
Аввалроқ Бухоро, Хоразм ва Тошкент вилоятларида валюта қимматликлари савдоси билан шуғулланиб келган шахслар ушланган эди. Шунингдек, Андижон вилоятининг Балиқчи ҳамда Олтинкўл, Бухоро вилоятининг Пешку туманида валюта қимматликлари савдоси билан шуғулланиб келган шахслар ушланган.
Шу билан бирга, Самарқанд вилоятининг Иштихон ҳамда Оқдарё туманларида валюта қимматликларини ноқонуний муомалага киритилишининг олди олинган.
Бундан ташқари, Самарқанд вилоятининг икки тумани, шунингдек, Хоразм вилоятининг Янгибозор туманида валюта айирбошлаш билан шуғулланиб келган шахслар ушланган.
Изоҳ (0)