Андижон вилоятининг Хўжаобод туманида Ўзбекистон Ёзувчилар уюшмаси ва Қирғизистон миллий Ёзувчилар союзи билан ҳамкорликда «Шарқ юлдузи» ва «Ала-тоо» журналлари ижодий жамоалари иштирокида адабий кеча ҳамда китобхонлар форуми бўлиб ўтди. Бу ҳақда «Дарё» мухбири хабар берди.
Қирғизистон миллий Ёзувчилар союзи масъул котиби, Тоголок Молдо мукофоти лауреати Жилдиз Акаева, уюшманинг Ўш вилояти бўлими раиси, Қирғизистонда хизмат кўрсатган маданият ходими Тўрабай Жороев, «Ўш садоси» газетаси бош муҳаррири Соҳиба Шокирова, шоир ва таржимон Охун Жўра, ёзувчи ва публицист Бегижон Аҳмедов, шоир Мамат Ибрайимдан иборат қардош халқнинг ижодкорларидан иборат делегация вакиллари «Дўстлик» чегарасида тантанали тарзда кутиб олинди.
Ўзбекистон Ёзувчилар уюшмаси Халқаро алоқалар ва бадиий таржима бўлими бош мутахассиси Рисолат Ҳайдарова, уюшманинг Андижон вилояти бўлими раҳбари Хуршида Ваҳобжон қизи, «Шарқ юлдузи» ва «Звезда Востока» журналлари бирлашган таҳририяти бош муҳаррири, таниқли шоир Сирожиддин Рауф, бош муҳаррир ўринбосари, таниқли шоир Азиз Саид, Ўзбекистонда хизмат кўрсатган маданият ходими Қамчибек Кенжа, Ўзбекистон Ёзувчилар уюшмаси Болалар адабиёти кенгаши раиси Ориф Тўхташ ва бошқалар ҳамроҳлигида Хўжаобод туманида адабий анжуманлар ўтказилди.
Анжуман иштирокчилари тумандаги мусиқа ва санъат мактабида ташкил этилган адабиёт, китобхонлик, санъат, мусиқа ва спорт йўналишлари бўйича кўргазмаларни, ёш ижодкорлар мушоираси, мақомчи ёш ижрочилар чиқишлари, ёш рассомларнинг ижодий ишларини кўздан кечирди.
Хўжаобод тумани ҳокимлигида бўлиб ўтган музокарада икки халқнинг ижодий жамоалари ўртасида қўшма қарор лойиҳаси тасдиқланди. Бунга кўра, Шавкат Раҳмон, Ғанижон Холматов Муғанний, Турсунбой Адашбоев каби икки халқнинг фарзандлари бўлган марҳум шоирларнинг, келажак авлодларнинг ижод намуналарини кенг тарғиботига алоҳида эътибор қилиниши, бадиий таржима асарларини нашр этиш каби ишлар белгиланди.
Изоҳ (0)