Қорақалпоғистоннинг Беруний ҳамда Тошкент вилоятининг Оққўрғон ва Янгийўл туманларида қўлбола алкоголь маҳсулотларини муомалага киритилишининг олди олинди.
Бош прокуратура ҳузуридаги департаментнинг Беруний тумани бўлими томонидан ўтказилган тезкор тадбирда фуқаро Ш.С. “Жайҳун” МФЙ ҳудудидаги “Э.” савдо дўконида тегишли тартибда давлат рўйхатидан ўтмасдан турли номдаги жами 279 дона истеъмолга яроқсиз алкоголь маҳсулотларини сотувга қўйгани аниқланиб, ушбу алкоголь маҳсулотлари ашёвий далил тариқасида олинган.
Шу каби, департаментнинг Оққўрғон тумани бўлими томонидан ўтказилган тезкор тадбирда туманидаги “Д.” МЧЖ раҳбари Д.Т. харидорга 2 дона қалбаки акциз маркали алкоголь маҳсулотини сотган вақтида ушланиб, ушбу савдо дўконидан 233 дона қалбаки акциз маркали алкоголь маҳсулоти ашёвий далил сифатида олинган.
Департаментнинг Янгийўл тумани бўлими томонидан ўтказилган тезкор тадбирда фуқаро П.М. яшаш хонадонида яширин цех ташкил этиб, қўлбола алкоголь маҳсулотларини ишлаб чиқариш билан шуғулланиб келгани аниқланиб, ушбу хонадондан “Ўзбегим” номли қўлбола алкоголь маҳсулотлари ва 120 литр спирт ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Самарқандда ароқдан заҳарланиш оқибатида 5 нафар эркак вафот этгани ҳақида хабар берилганди.
Андижон вилоятида 2024 йил декабрида 5 киши спиртли ичимликдан заҳарланиб вафот этганди. 22 киши Ўзбекистон акциз маркаси ёпиштирилган “Ўзбекистон” номли коняк истеъмол қилгани оқибатида шифохонага ўткир заҳарланиш ташхиси билан ётқизилган. Шифокорлар томонидан кўрсатилган зарур тиббий ёрдамга қарамасдан, уларнинг 5 нафари вафот этганди.
2025 йил 14 январь куни Туркиянинг Истанбул шаҳрида 6 нафар ўзбекистонлик фуқаро қалбаки алкоголдан заҳарланиб вафот этди.
Изоҳ (0)