Andijon tuman hokimi Boburjon Yuldashev 20 yoshdan 45 yoshgacha bo‘lgan onalar o‘rtasida kitobxonlik musobaqasini o‘tkazish tashabbusi bilan chiqdi. Bu haqda tuman hokimligi axborot xizmati xabar berdi.
Ta’kidlanishicha, tanlov yakunlari bo‘yicha 1-o‘rinni egallaganlarga 6 oylik elektr, gaz, ichimlik suvi va boshqa turdagi kommunal to‘lovlar to‘lab beriladi. Ikkinchi va uchinchi o‘rinlarni qo‘lga kiritganlar 4 va 2 oylik kommunal to‘lovli vaucherlar sohibiga aylanishi mumkin.
“Daryo” muxbiri bog‘langan Andijon tumani hokimi Bobirbek Yuldashev bilan bog‘landi. Hokimning ta’kidlashicha, tanlov orqali uyda o‘tiradigan xotin-qizlarni kitobxonlikka jalb qilish rejalashtirilgan.
Bugun ayrim yosh onalar farzandlari savol bersa ham bilmasdan telefon titkilab, internetdan aytib beryapti. Ko‘p narsani bilmaydi, kitob o‘qimayapti.
Eng katta maqsadim uyda o‘tirgan ayollar o‘rtasida kitobxonlikni rivojlantirish va shu orqali kelajak avlodni yetuk qilib tarbiyalashda oz bo‘lsa-da hissamni qo‘shish.
Men o‘ylaymanki, shu tanlov bahonasida eng kami besh yuz, olti yuztaga yaqin onalarimiz qo‘liga kitob oladi. Kitoblarni o‘qish orqali dunyoqarashi yanada kengayadi. Asosiysi oilada kitobxonlik muhiti yaratiladi, deydi tuman hokimi.
Hokimning aytishicha, tanlov mahalliy byudjetdan orttirilgan va homiylik mablag‘lari hisobiga o‘tkaziladi.
Kimdir kasal bo‘lsa, yana kimdir qandaydir shaxsiy muammolari yoki o‘qishiga pul to‘lolmasdan bizga kelib murojaat qiladi. Ularga pul ajratyapmiz, yordam qilyapmiz. Kerak bo‘lsa, mahalliy byudjetdan ayrim narsalar uchun mablag‘ sarflayapmiz. Qisqasi, shularga pul topyapmiz. Lekin, kitobxonlikni rivojlantirish uchun yetarli darajada e’tibor qaratmaskanmiz.
O‘zingiz bilasiz, bizda aksar ayollarimiz, ya’ni kelinlarimiz uyda o‘tiradi. Qaynota-qaynonasining xizmatini qiladi, farzandlarining tarbiyasi bilan mashg‘ul. Bundan bo‘sh qolsa internet kovlaydi yoki televizorda serial ko‘radi.
Shularni o‘ylab, bu tanlovni tashkil etishni maqsad qildim, deydi hokim Bobirbek Yuldashev.
Nega mukofotga aynan kommunal to‘lovlar?
G‘oliblarga kommunal to‘lovlarni to‘lab berish orqali kitobxonlikni rivojlantirsa bo‘larkanmi, degan savolni o‘rtaga tashlashingiz mumkin. Biz ham rosa o‘ylandik. Keyin bugun oilalardagi eng katta muammoli masalalardan biri bu kommunal to‘lovlarni to‘lash zarurati ekanligini hisobga olib, mana shu variantni tanladik.
Har bir ayol kuniga o‘n-o‘n besh betdan kitob o‘qisa ham uch oyda beshta kitobni bemalol tugata oladi. Uyda o‘tirib, kitob o‘qish orqali ozgina bo‘lsa ham oilaviy byudjetga foyda keltirgan kelin qaysi qaynonaga yoqmaydi. Albatta, yoqadi. Asosiysi, niyatimiz yaxshi. Shu orqali xayrli ishga qo‘l urdik, deydi Bobirbek Yuldashev.
Ma’lum qilinishicha, tanlov yil davomida to‘rt marotaba, ya’ni har chorakda bir o‘tkaziladi. Birinchi tanlov joriy yilning 1-fevralidan 25-martga qadar bo‘lib o‘tadi. Ishtirokchilarga o‘qish uchun beshtadan kitob beriladi.
Tanlov uch bosqichda tashkil etiladi. Birinchi bosqich mahallalar kesimida test tartibida o‘tadi. Unda har bir mahalladan elliktadan xotin-qizlar qatnashishi ko‘zda tutilmoqda. Har bir mahalladan g‘olib aniqlanib, sektor bosqichiga yo‘llanma oladi. Yakuniy tuman bosqichida sektorlar kesimida g‘olib bo‘lganlar bellashadi. Eng kuchli deb topilgan 9 nafar ishtirokchiga egallagan o‘rniga qarab, kommunal to‘lovlari to‘lab beriladi.
Izoh (0)