Андижон вилоятининг Марҳамат тумани ҳокими 15 ёшдан 30 ёшгача бўлган ёшлар ўртасида «Зукко китобхон» танловини ўтказди. Танлови ғолиби ота-онаси билан биргаликда Дубайга саёҳатга юборилади. Бу ҳақда «Дарё»га туман ҳокимлиги ахборот хизмати хабар берди.
Маълум қилинишича, ушбу танлов тумани ҳокими Бобур Йўлдошев ташаббуси билан ёшларнинг китоб ўқишга қизиқишини ошириш, китобхонлик ва мутолаа маданиятини юксалтириш, уларнинг интеллектуал салоҳиятини юксалтириш мақсадида ўтказилган.
Танлов икки босқичда ташкил этилган бўлиб, унда Ўзбекистоннинг турли вилоятларидан келган 500 нафарга яқин ёшлар ўз билимларини синовдан ўтказган. Иштирокчилар «Ўзбек адабиёти билимдони», «Жаҳон адабиёти билимдони» ҳамда «Зукко китобхон» шартлари бўйича савол-жавоблар асосида ғолиблик учун беллашган.
Танлов якунига кўра, Марҳамат туманидаги 7-умумтаълим мактабининг 10-синф ўқувчиси Солиҳа Ғуломжонова биринчи ўринни эгаллаб, ота-онаси билан бирга Дубайга саёҳат қилиш учун йўлланмани қўлга киритган. Иккинчи ўрин ҳамда уч кишилик Тошкент, Самарқанд, Бухоро ва Хива шаҳарларига саёҳат йўлланмаси пахтаободлик Андижон давлат университети тадқиқотчиси Маъмура Мадаминовага насиб қилган. Учинчи ўрин соҳиби бўстонлик Маржона Акрамжоновага эса маиший техника буюмлари топширилган.
Аввалроқ Шавкат Мирзиёев «Заковат интеллектуал ўйинини аҳоли ўртасида оммавий-маърифий ҳаракатга айлантириш ва бошқа интеллектуал ўйинларни ривожлантиришга оид чора-тадбирлар тўғрисида»ги қарорни имзолагани тўғрисида хабар берилганди. Унга кўра, 2022/2023-ўқув йилидан бошлаб интеллектуал ўйинларнинг республика босқичида ғолиб бўлган ўқувчи ёшлар ва талабалар учун йил давомида ҳар ойда бериладиган «Заковат» стипендияси жорий этилади.
Изоҳ (0)