Хусусий корхона ҳисоб рақамидаги 60 миллион сўм пулни шахсий эҳтиёжлари учун ўзлаштирган “Халқ банки”нинг Сурхондарё вилояти филиали Узун банк хизматлари маркази бош мутахассисига суд ҳукми ўқилди.
Маълум бўлишича, “Халқ банки” Сурхондарё вилояти филиали Узун стандарт банк хизматлари маркази Чакана бизнес бўлими бош мутахассиси лавозимида ишлаган Расул Холмирзаев (исм-фамилиялар ўзгартирилган) бир вақтнинг ўзида Бухгалтерия ҳисоби ва ҳисоботи ҳамда операциялар бўлими мутахассиси вазифасини ҳам бажариб жиноят содир этган.
У 2024 йилнинг 13 май куни дастлаб банк мижози бўлган “ША файз барака” хусусий корхонасининг ҳисоб рақамидаги пулларни ўзлаштириш мақсадида корхона раҳбарининг телефонига уланган банк операциялари ҳақидаги SMS хабарлар киришини чеклаган. Шундан сўнг фаррошдан унинг опасига тегишли пластикни олиб, махсус дастур орқали ҳужжатларни сохталаштирган ҳолда пластик картага 60 миллион сўм пулни ўтказган. Қўлга киритилган маблағнинг 19 миллион сўмини нақдлаштириб, қолган қисмини “Alif” мобил иловасидан бошқа шахсларга ўтказиш орқали талон-тарож қилган.
Орадан йигирма кун ўтар-ўтмас, 31 май куни корхона ҳисобчиси банкка келганида ҳисоб рақамидан нотаниш пластик рақамига ортиқча маблағлар ўтказилганини билиб қолган ва уч кун ичида пулларни жойига қайтаришни сўраган. Бироқ Расул Холмирзаев белгиланган вақтда пулни жойига қўймагач корхона масъуллари банкнинг минтақавий марказ бошлиғига шикоят қилган.
Қинғир ишнинг қийиғи чиққач, Расул 4 июнь куни ўзлаштирилган барча пулларни “нотўғри ўтказилган маблағ қайтарилмоқда” деган асос билан қайтаришга мажбур бўлган.
Жиноят ишлари бўйича Узун тумани суди мазкур ишни кўриб чиқиб, муқаддам судланган Расул Холмирзаевни Жиноят кодексининг 167-моддаси 3-қисми “г” банди билан айбли деб топган ва унга нисбатан иш ҳақининг 20 фоизи миқдорида давлат даромади ҳисобига ушлаб қолган ҳолда 2 йил муддатга ахлоқ тузатиш ишлари жазоси тайинлаган. Шунингдек, у 1 йил-у 6 ой муддатга давлат органи, давлат иштирокидаги ташкилотларда мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилинган.
Аввалроқ Самарқанд шаҳрида тадбиркорнинг 6,4 млрд сўм маблағини қимор ўйинларига ютқазган ҳисобчи аниқланганди.
Эслатиб ўтамиз, 2022 йилда “Халқ банки”нинг Андижон вилояти Амалиёт бўлими ходимлари 4,6 миллиард сўмни ўзлаштиргани аниқланган эди.
Изоҳ (0)