2018 йилнинг ноябрь ойида «Дарё» мухбири Миролим Исажоновнинг «Шароф Рашидов қурдирган кутубхона жар ёқасида. Унга ким қўл чўзади?» номли танқидий мақоласи эълон қилинган эди. Унда атоқли давлат арбоби ва ёзувчи Шароф Рашидов ташаббуси билан 1982 йили Андижон вилоятининг Шаҳрихон туманидаги «Баркамол авлод» маҳалласида қад ростлаган кутубхонанинг кун сайин ачинарли ҳолатга келаётгани ҳақида атрофлича фикр юритилганди. Шундан сўнг орадан бир ярим ой вақт ўтиб, таҳририятимизга мазкур мақола юзасидан Андижон давлат тиббиёт институти ректори Мадамин Мадазимов имзоси билан ёзилган жавоб хати келганди. Мактубда ушбу кутубхона жорий йилнинг сўнгига қадар тўлиқ қайта таъмирланиши таъкидланган эди.
Мазкур зиё масканида Шаҳрихон тумани ҳокими Ҳикматилло Дадахонов бошчилигида китобхонлик акцияси ташкил этилди. Унда ҳудуддаги сектор раҳбарлари, туман Кенгаши депутатлари, ташкилот, корхона ва муассаса раҳбарлари, ўқувчи ёшлар иштирок этиб, кутубхонага китоблар совға қилишди. Натижада кутубхона фонди 3500 дона адабиётга бойиди.
Туман ҳокимининг айтишича, кутубхона Андижон давлат тиббиёт институти балансидан туман маданият бўлими тасарруфига олинди. Қисқа фурсатда «Саховат қурилиш» МЧЖ томонидан мукаммал таъмирдан чиқарилади.
Изоҳ (0)