Ylе нашри журналистлари Финляндия парламентининг учта ҳожатхонасида гиёҳванд моддалар қолдиқларини топишди.
Улар нам салфеткалар билан ҳожатхона юзаларини артиб чиқишди ва намуналарни Measurlabs лабораториясига жўнатишди. Лаборатория текширувларида салфеткаларда амфетамин, экстазия ва кокаин излари аниқланди.
Намуналар 2024 йил декабрь ойида парламент биносининг учинчи ҳамда бешинчи қаватларидаги эркаклар ва аёллар ҳожатхоналаридан олинган. Психоактив моддаларнинг излари фақат бешинчи қаватда олинган намуналарда топилган: одатда у ерда парламент гуруҳларининг мажлислари ўтказилади. Журналистлар тадқиқот учун намуналар олган куни ўша қаватда Рождество кечаси бўлиб ўтган.
Нашрнинг таъкидлашича, парламентга фақат депутатлар ташриф буюрмайди, бироқ бинода қатъий назорат ўрнатилган.
“Албатта, парламентда бу ерда ишлаши мумкин бўлган одамлар гиёҳванд моддаларни истеъмол қилаётгани ҳақида аломатлар пайдо бўлиши ачинарли. Бу жамиятда гиёҳванд моддаларни истеъмол қилиш кўпайиб бораётганидан далолат беради”, дея журналистларнинг суриштирувига парламент спикери Юсси Халла-аҳо изоҳ берди.
Унинг қўшимча қилишича, эдускунта (Финляндия парламенти) психоактив моддалардан фойдаланишга нисбатан чоралар кўриши мумкин.
“Парламент биносида гиёҳванд моддаларни истеъмол қилишнинг олдини олиш учун имкониятлар кам”, дейди у.
Изоҳ (0)