Андижон вилоятининг Марҳамат туманида ўтказилган тезкор-профилактик тадбир давомида гиёҳвандлик моддасини сотиш ва сақлаш билан шуғулланувчи икки нафар шахс ушланди. Бу ҳақда “Дарё”га вилоят ички ишлар бошқармаси ахборот хизмати хабар берди.
Маълум қилинишича, Ички ишлар вазирлиги тезкор-қидирув департаменти, Андижон вилояти ички ишлар бошқармаси Тезкор-қидирув хизмати Жиноят қидирув бошқармаси ҳамда бошқа ҳуқуқни муҳофаза қилувчи органлар билан ҳамкорликда Марҳамат туманида тезкор тадбир ўтказилган.
Тезкор тадбир натижасида Марҳамат туманида яшовчи икки нафар шахс 288 грамм гашиш гиёҳванд моддасини 3500 АҚШ долларига сотаётган вақтида қўлга олинган. Бундан ташқари, тезкор-тадбир давомида ушланган шахслар ўзларининг яшаш уйларида оғирлиги 306 грамм гашиш гиёҳванд моддасини сақлаб келаётганликлари ҳам фош этилган.
Ўтказилган тезкор тадбир давомида умумий оғирлиги 594 грамм гашиш гиёҳванд моддаси далилий ашё сифатида олинган.
Мазкур ҳолат юзасидан Марҳамат тумани ички ишлар бўлими ҳузуридаги тергов гуруҳи томонидан Жиноят кодексининг 273-моддаси 5-қисми билан жиноят иши қўзғатилиб, ҳозирда тергов ҳаракатлари олиб борилмоқда.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)