Футбол ўзининг жозибадорлиги, супер голлари ва фейр-плей каби адолатли қоидалари билан машҳур. Аммо мухлислар эътиборини футбол оламидаги муштлашувлар, жанжаллар, ичкиликбозлик ва гиёҳвандлик, шафқатсизлик ва аҳмоқликлар ҳам тортади. Қуйида футбол оламидаги энг шов-шувли можароларни ёдга оламиз.
Футболдаги ичкиликбоз
Англия футболи юлдузи Пол Гаскойн 90 йилларда Буюк Британиянинг энг машҳур одамларидан бири бўлган. У стадионга минглаб мухлисларни жалб қилар ва футболни аъло даражада ўйнарди. Айниқса, у Шотландиянинг “Рейнжерс” клуби билан катта ютуқларга эришган, жумладан, икки марта мамлакат чемпионлигини қўлга киритган. Гаскойн ғалати қилиқлари билан тез-тез янгиликлар орасидан жой оларди. Бир сафар Пол “Мидлсбро” клубининг автобусини ўғирлаб кетган ва уни пачоқ қилган.
Бошқа сафар “Лацио”даги тақдимотда ҳам ўзини ғалати тутиб, бир неча бор камера олдида уятли мавзуларда ҳазиллашган. Футболчилик фаолиятини якунлаганидан сўнг эса ичкиликка берилиб кетади. Ҳушдан кетгунча ичиш, жанжаллар, қон тўкилишигача бориб етадиган муштлашувлар — буларнинг барчаси Полнинг одатий турмуш тарзига айланган. У йиллар ўтиши билан донолашиш ўрнига, қарияпти, холос.
Кантона ва унинг зарбаси
90 йиллар футболининг яна бир юлдузи Эрик Кантона ҳам ёши улғайгач, бир оз ўзгарди. Лекин унинг ёшликдаги бебош хатти-ҳаракатлари ҳақидаги воқеаларни футбол мухлислари ҳалигача эслайди. Жамоадошлари билан тортишувлар — унинг бундай “саргузаштлари”нинг кичик бир қисми, холос. Шунингдек, Кантона йиртилган либосини ҳакам томонга ирғитган ва Франция терма жамоаси бош мураббийи Анри Мишелни ҳамманинг олдида “ахлат қопи” дея ҳақорат қилган.
Албатта, франциялик футболчининг фаолиятидаги энг шов-шувли воқеани ҳам унутиб бўлмайди: бир куни у майдондан четлатилгач, томошабиннинг провокациясига учиб, уни калтаклаш учун трибунага чиқиб кетади. Мухлисни тепишга уринаётган Эрикнинг сурати барча таблоидларда қайд этилди. Кантона жарима тўлашига ва 120 соат жамоат ишларида иштирок этишига тўғри келди.
“Худонинг қўли” аралашган машмашалар
Диего Марадона дунёнинг минглаб одамларини футболга ошиқ қилган бўлса-да, бир неча бор жанжалли воқеаларга аралашиб қолган. 90 йилги Жаҳон Чемпионати чорак финалида қўли билан гол ургани футболга оид мавзу бўлса, кокаин истеъмоли, допинг қабул қилиши, журналистларга пневматик милтиқдан ўқ узиш, аэропортдаги тўполонлар сариқ матбуот учун ноёб топилмалар бўлган.
Бироқ, йиллар ўтиб, Диего ўзининг шўх феълини жиловлашга эришган. Гиёҳвандликдан даволанган, турли хайрия тадбирларида иштирок этган. Футбол соҳасида эса Аргентина ва Яқин Шарқда мураббий сифатида баъзи ютуқларга эришган.
Буюк иғвогар
Италиялик ҳимоячи Марко Матерацци ўз номини футбол тарихига ўчмас қилиб ёзиб қолдирган. 2006 йилги мундиалда ҳимоячининг провокациясига учиб, Зидан унинг кўкрагига боши билан зарба беради ва майдондан четлатилади. Бир соатдан кейин эса Марко кубокни боши узра кўтаради. Албатта, бу Марконинг биринчи ёмон қилиғи эмасди. 2003 йилги Милан дербисида Матерацси Андрей Шевченконинг жиғига тегади ва оқибатда кўзидан зарба қабул қилиб олади. Орадан бир йил ўтиб, Марко ўз ҳисобига яна икки қурбонни киритиб қўйди: трибуна остида “Сиена” ҳимоячисини уради ва бир мушт билан “Вильярреал” ўйинчиси Сориннинг бурнини синдиради.
“Жиннилар тўдаси” бошлиғи
Агар Матерацци рақибга айёрлик билан таъсир ўтказган бўлса, “Болта” лақабли Винни Жонс ҳеч қачон рақибларга чап ёки ўнг томондан зарба беришга тортинмаган. Бу йигит футбол майдонида ўзининг ўта қўполлиги билан машҳур бўлди — у 12 марта қизил карточка билан жазоланган, бир марта майдонга тушганидан 3 сония ўтиб, дарҳол қўполлик қилган. 90 йилларда Виннининг жамоаси “Уимблдон”ни “жиннилар тўдаси” деб ном олган ва Жонс ўзини бу тўданинг бошлиғи сифатида ҳис қилган.
Унинг фаолиятида “футбол қотиллиги” ҳам бўлган — Англия терма жамоаси футболчиси Гери Стивенсга жуда жиддий қўполлик ишлатган. Натижада, Гери фаолиятини якунлашга мажбур бўлган. Жонснинг ўзи буцаларини михга илгач, киноларда ўзини синаб кўра бошлади. Ва ҳозирда ҳам муваффақиятли актёр сифатида ўзини намоён этмоқда.
Майдондаги қотиллик
Панама терма жамоаси футболчиси Луис Moрeно футбол майдонида том маънода қотилликни амалга оширди. Тўғри, футболчи ўз рақиби ёки томошабинларга зарар етказмади, оддий бойқушни ўлдириб қўйди. Колумбия чемпионатидан ўрин олган “Депортиво Перейра” ва “Атлетико Хуниор” жамоалари ўртасидаги баҳсда Moрeно бойўғлини тўпдек тепиб юборди ва қуш 3 метр узоқликка учиб кетади. Бойқуш бир кундан кейин ветеринария марказида ўлиб қолди.
Бойўғли рақиб жамоанинг маскоти бўлгани вазиятни яна оғирлаштирган, шунинг учун Луис “Атлетико” мухлислари томонидан қаттиқ танқидларга дучор бўлган. Moрeнонинг ўзи уни футбол тарихидаги энг даҳшатли ишлардан бирини қилишга нима ундаганини тушунтириб бера олмади.
Англиялик зўравон
Инглиз футболчиси Жо Бартон Луис Moрeно билан солиштирганда, шунчаки яхши инсон. Ҳеч бўлмаганда у “қотиллик” қилмаган. Ҳа, бир марта “Манчестер Сити”даги жамоадоши Жейми Тендининг кўзига сигарет тутган. Жамоада жанжал кўтарилмаган, балки Бартонга катта миқдорда жарима солинган. Ундан ташқари, Тендининг ўзи ҳам кейинчалик Бартондан 65 минг фунт стерлинг ундирган.
Жо “Эвертон” мухлислари билан можародан кейин ҳам катта миқдорда жарима тўлаган. Дастлаб, у мерсисайдликларнинг 15 ёшли мухлисини урган, орадан бир ҳафта ўтиб, мавсумолди турнирда томошабинлар тарафга қараб, номақбул ҳаракатларни амалга оширган. Калтак учун у 120 минг фунт тўлаган бўлса, иккинчи қилиғи жазосиз қолган.
Бензема ва унинг жинсий зўравонлик бўйича можаролари
Франциялик ҳужумчи Карим Бензема фаолиятининг юқори чўққисида бўлган вақтларда терма жамоага чақирилмай қўйганди. Ушбу четлатишнинг асосий сабаби жинсий зўравонлик бўйича айбловлар эди. Карим 2010 йилларда Франк Рибери ва Сидней Гову билан биргаликда муаммоларга дуч келгандаёқ “сариқ карточка” олганди. Маълум бўлишича, учаласи ҳам вояга етмаган қизга жинсий тажовуз қилган. Учаласи ҳам қизнинг ёши ҳақида билмаганини таъкидлаган ва шундан сўнг оқланган.
Орадан 5 йил ўтиб эса, Бензема жамоадоши Матье Валбуэнага унинг иштирокидаги видео билан шантаж қилиш ишларида иштирок этганликда айбланиб, терма жамоадан “чиқариб ташланади”. Каримнинг жиноий схемада иштирок этгани ҳақидаги тўғридан тўғри фактлар аниқланмаган, у на қамоқ жазосини ўтади, на жаримага тортилди. Лекин шундан кейин бир муддат терма жамоага чақирилмади.
Ўз тишларини рақибда синаб кўриш
“Ливерпуль” ва “Барселона” собиқ ҳужумчиси Луис Суарес рақиб футболчиларини тишлашдан ҳам тоймаган. Ҳозирда “Интер Майами”да тўп сураётган уругвайлик футболчи фаолияти давомида камида 3 марта рақибларини тишлаган. 2010 йилнинг ноябрь ойида “Аякс”да ўйнаган Суарес Отман Баккални тишлаган ва 7 ўйинга дисквалификация қилинган.
2013 йилнинг апрелида Луис “Ливерпуль” ва “Челси” ўртасидаги қарама-қаршиликда Бранислав Ивановични тишлаб олган, бироқ буни ҳакам сезмай қолгани учун жазосиз қолган. Ниҳоят, учинчиси 2014 йилги Жаҳон Чемпионатида бўлган: жабрланувчи — италиялик Жоржо Кьеллини. Ушбу воқеадан кейин уругвайлик футболчи катта миқдорда жарима тўлади ва 4 ойга футболдан четлатилди. Шундан кейин Сауреснинг “Барселона”даги олтин даври бошланиб, барчаси унутилди.
Изоҳ (0)