2024 йилда Тошкент шаҳрида ҳуқуқ-тартибот органлари томонидан ўтказилган тадбирлар натижасида 240 килограммга яқин гиёҳвандлик ва психотроп моддалар аҳоли орасида тарқалишининг олди олинди.
Наркотикларни рекламасини тарғиб қилувчи 7 162 та “наркограффити” ёзувлари аниқланиб, улар ўчирилди. Наркотиклар савдоси ва уларни тарғиб қилаётган 13 мингдан ортиқ ижтимоий тармоқлардаги гуруҳлар ва каналлар фаолиятига чек қўйилди.
Шундай бўлса-да, бугунги кунда барча ривожланган давлатлар ва йирик мегаполис шаҳарларда кучли таъсир қилувчи, психотроп ва гиёҳвандлик моддаларнинг янгича турлари ҳамда улар савдосининг янги усуллар кун сайин кенг тарқалмоқда.
Масалан, махсус электрон ҳамёнлар орқали тўлов амалга оширилиб, “сотувчи” ва “харидор”нинг тўғридан-тўғри мулоқотисиз, “закладка” (яшириш) йўли орқали гиёҳванд моддаларнинг ноқонуний муомаласи пайдо бўлган.
Ушбу ҳолатларни инобатга олиб, аҳоли орасида наркотикларнинг тарқалишини олдини олиш мақсадида Тошкент шаҳар ҳуқуқни муҳофаза қилувчи органларнинг қўшма ҳаракатлари асосида 15 январдан бошлаб “Хавфсиз ва соғлом пойтахт” комплекс тезкор-профилактик тадбирлари ўтказилиши ташкил этилди.
Комплекс тадбирлардан асосий мақсад, ёшларда гиёҳвандликка қарши иммунитетни пайдо қилиш, ўқувчи ва талабалар орасида кучли таъсир қилувчи дорилар истеъмолига муросасиз муносабатни шакллантириш каби мақсадни қўймоқда.
Бунда пойтахт ҳудудидаги барча 468 та мактаблар ва 90 та олий таълим муассасаларида, 585 та маҳаллаларда, корхона-ташкилотлар ҳамда аҳоли гавжум жойларда учрашувлар ўтказилиб, тарғибот-ташвиқот ва тарбиявий-профилактик тадбирлар ташкил этилиши режалаштирилган.
Шу билан бирга, Интернет ва ижтимоий тармоқлар воситасида наркотикларни сотиш ҳолатларини аниқлаш, уларнинг уюшган жиноий схемаларини фош этиш, ёшлар орасида ушбу моддаларнинг тарқалишига чек қўйиш бўйича манзилли тезкор-профилактик чоралар кўрилади.
9 январь куни Сурхондарёда 112 млн сўмлик марихуана сотаётган шахслар ушланган.
15 январь куни Самарқанд вилоятининг Ургут туманида яшовчи шахслар Тожикистондан Ўзбекистонга гиёҳвандлик воситаси олиб киришда айбланиб, 16 йилга қамалгани хабар қилинганди.
Изоҳ (0)