Қарши магистрал каналидан фойдаланиш бошқармаси томонидан 2024 йилда ўтказилган тендерлар асосида бошқармага қўшни фирма томонидан салкам 8 миллиард сўмлик иш бажарилгани, шунингдек, ушбу фирма билан жами 5 та 2,5 миллиард сўмлик тўғридан тўғри шартнома имзолангани ҳақида хабар берилган эди. Мазкур ҳолат юзасидан Рақобатни ривожлантириш ва истеъмолчилар ҳуқуқларини ҳимоя қилиш қўмитаси ахборот хизмати муносабат билдирди.
Маълум қилинишича, қўмитанинг Қашқадарё вилояти ҳудудий бошқармаси томонидан “Қарши магистрал каналидан фойдаланиш бошқармаси” ДМ томонидан амалга оширилган давлат харидларида рақобат қонунчилиги талабларига риоя қилинганлиги юзасидан ўрганиш ишлари ўтказилган.
Ўрганишлар натижасида Буюртмачи томонидан энг яхши таклифларни танлаш орқали амалга оширилган давлат харидларида “Рақобат тўғрисида”ги қонун талаблари бузилиши аломатлари билан буюртмачига нисбатан иш қўзғатилиб, натижаси юзасидан қонунбузилиши ҳолатларига йўл қўймаслик бўйича бажарилиши мажбурий бўлган кўрсатма берилган.
“Буюртмачи (Қарши магистрал каналидан фойдаланиш бошқармаси) мансабдор шахсига нисбатан маъмурий баённома расмийлаштирилди. Шу билан биргаликда, ўрганиш давомида кузатилган манфаатлар тўқнашуви аломатлари бўйича маълумотларга ҳуқуқий баҳо берилиши учун прокуратура органларига юборилди”, дейилади муносабатда.
Аввалроқ “Халқ банки” Сурхондарё вилояти Бойсун, Узун, Музработ ва Олтинсой туманларида жойлашган банк биноларини таъмирлаш бўйича тендерлар ўтказгани, уларда ака-укаларга тегишли қурилиш компаниялари рақобатлашгани ҳақида хабар берилган эди. Мазкур ҳолат юзасидан Коррупцияга қарши курашиш агентлиги томонидан юқоридаги қонунбузилиши ҳолатларини бартараф этиш ва келгусида олдини олиш юзасидан Ўзбекистон Республикаси Марказий банкига тақдимнома киритилгани маълум қилинганди.
Изоҳ (0)